ONGWEDIVA – Omupresidente wehangano lovanhu ve na oulema woshipa loNamibia Albino Association, Joseph Ndinomupya okwa ti ngeno kapa li Omukokolipresidente Sam Nujoma ngeno ihava kwata oshimaliwa shopendjela.
Okwa ti Nujoma okwa li e hole ovanhu ve na oulema woshipa molwaashi oye wotete a popya kutya ovanhu ve na oulema woshipa navo nava kale tava kwata oshimaliwa shopendjela osho hashi di kepangelo.
Ndinomupya okwa ti okwa shakeneka Omukokolipresidente omudo 1989 pefimbo olo a dja kondje yoshilongo mekondjelomanguluko.
“Alushe ngeenge twa shakena naye oha popi ta ti ovanhu ve na oulema woshipa inava ningilwa omunyonena molwaashi navo ovanhu ngaashi naana ovanhu aveshe,” ta ti.
Okwa ti pefimbo Nujoma a ninga omupresidente okwa yandja elombwelo kutya ovanhu ve na oulema nava kale tava pewa omaadi okuvava oshali koipangelo.
“Nujoma ka li e na okatongo koukwamuhoko. Okwa li a tala ko ovanhu aveshe ve fike pamwe,” ta ti. Ndinomupya okwa ti ova pandula Nujoma molwaashi okwe va kondjela okukala paife va manguluka ngeenge tava ende mokati kovanhu.
“Koilongo imwe ovanhu ve na oulema woshipa inava manguluka ngeenge tava ende mokati kovanhu, ashike moNamibia fye otwa manguluka,” ta ti.
Okwa weda po ta ti mounyuni wonale ovanhu ve na oulema woshipa okwa li hava dipawa molwaashi vati ngeenge va dalwa mepata lonhumba osha hala kutya omupya.
Ndinomupya okwa tanga Nujoma ta ti okwa li omuleli muwa e na olukeno noshiwana.
“Nujoma okwa wanifa po oilonga yaye. Otwa pumbwa okutumbaleka omulumenhu ou molwaashi okwe shi pondola okutuetela emanguluko,” ta ti.
Okwa ti ondjokonona yaNujoma nai twikile okulongwa meefikola komapupi tae uya opo ounona ve lihonge nghene Nujoma a dana onghandangala pefimbo loita.