Selma Nambaxu ina yokaana keedula nhatu oko vati ka xulifa konima eshi ka kwatwa onghonga komufekelwa weedula 88 okwa hokolola ta ti pamwe ngeno okaana kaye oka ka ninga omundokotola ile omuhongifikola.
Omukainhu weedula 28 omukalimo womomukunda Okahanya moshitukulwa Oshikoto okwa ti okwa dengwa pomutima kefyo lokaana kaye koshiveli Fiina Nangwena eshi a kala alushe e na omukumo kutya pamwe ota keke mu kufa ko komesho yeedula ngeenge ka kulu. “Ihandi kofa vali nawa eshi handi kala alushe handi li pula okaana kange. Ka shipu okufilwa okaana koye ngeenge ka longelwa omunyonena,” Nambaxu ta ti.
Okwa weda po ta ti okwa kumwifa koshimbuluma osho vati sha longwa komukulupe Gustav Willem ou vati ta tamanekwa oshibofa shekwatonghonga nedipawo. Omudo wa djako muDesemba Willem okwa kwatwa po konima eshi vati a kwata okaana onghonga nokukadipaa momukunda Okahanya moshitukulwa shaShikoto. Oshibofa shaye osha undulilwa komafiku 03 Aprili 2023 omanga ta ku ningwa omakonakono.
Nambaxu okwa pula omhangu opo iha mangulule omufekelwa oo shaashi itashi ulike efano liwa ngeenge okwa mangululwa omanga ye a kanifa okaana kaye.
Okwe weda po ta ti okwa hangika ashike opo a mono oilonga yaye a ninga ko oshivike shimwe, ko okaana kaye okaxulifa.
Okwa kumaida ovakainhu vakwao opo va kale vakotoka ngeenge tava fiye ounona voukadona novalumenhu shaashi paife ounona voukadona ova ninga oihakanwa yokulongelwa ominyonena dopaixulo.