WINDHOEK- Mandaha kalikere ezuva lyehudi omu ministera Erkki Nghimtina noroli kavakare mehudi, age kahere kurupuka eroli eli. Eroli eli lyakara asi kwahamena koministeli zouyirugana nougendero ano ruha oro kapitire ministera kakukare hena ehauto lina kutunda komeho. Moomo tupu kahere kupita eroli age yiyo nye kaliboyore mekoso lyeroli lyokorulyo kumwe nokuzumbanesa mpangera. Ehauto lyendi yipo kukagwa ntani musingi eroli nage yiyo kazumbanesere mpangera eyi kayitwarederere eroli lika kambame moyihwa. Ehauto lyaministera kunakulitjangurura asi kapi ngavaliwapayika hena age kakere merago eparuke mehudi lyangesi. Yimo ana kutanta Mukuronagona govaporosi mukunda Otjozondjupa Komisara gona Gerhard Uataurua Mavenjono. Nghimtina ogu ana kara asi Ministera goyirugana nougendero karemanene unene monturo, yipo kavamudukisire kosipangero saKatolika moVenduka omu ana kara asi age kunakugwana uhaku. Musingi geroli ogu ana divikwa asi Simasiku Matongo, munwa gumwe gekondjero manguruko ngesi kuna kugwana uhaku mosipangero saOtjiwarongo sepangero. Mukaro gwendi kuna kugutanta asi kuna kuwapa tupu.
Nghimtina pomuhowo kakere mosipangero saMedi Clinic moOtjiwarongo komeho vayamudamune nodira aze koVenduka. Ehudi kalihorokere momandaha vili 17:30 nokilo 33 kuza ko Otjiwarongo podraai zokuza pomaholi gopoEtunda kutundilira koOtavi. Mokukwama ava kavayimwene, Nghimtina kakere nondjato zina kara noyimaliva. Nye mukurona ogo govaporosi kapi ana kutanta asi yimaliva yosinke age kuna kutanta tupu asi yimaliva kuna kuyipungura nawa vandindire mwenyayo averuke.
“Ame kanihere asi niuyunge nendi kuhamena yimaliva siruwo oso age moOtjiwarongo mosipangero, nye age mwene kapi kahere kuuyunga yimali posiruwo oso. Ose ngesi kuna kutara tupu asi gahepa kuveruka, yina kutanta asi tanko ukangu ntani yimaliva. Nye yimaliva kuna kara mekeverero lyewa. Nghimtina kakeremo gelike mehauto eli lina kara asi lyamwene XC90 Volvo lyomaudano (SUV). Eroli eli kalikere asi Nghimtina kahere kulirupuka kalikere nousura wepungu morugendo rokuza koSomeya, melikwamo lyorukukutu lyepangero. Matongo ogu gakara asi moGrootfontein kagendere nomuntu ogu ana pilire kudivikwa, ogu ana kara asi age karemanene tupu nakauke anon age kuna kugwana uhaku moOtjiwarongo. Epuro kalikere asi ministera nampo kakere tasingi makurusingilira, siruwo sehudi, Mavenjono katente asi, kapi kapakere emeto lyosiputa yipo vatere asi nampo kappa kare makurusingilira nahena kapi ana hara kugazarere asi yinke kayireteserepo siponga sangesi.