Omuulikwa a ithikamena Rehabeam Tulonga Nghinyengwile (31), ngoka a kutha ombinga methigathano lyokulela oshikandjohogololo shaHangwena ota ti, ota eta elunduluko ngele a sindana.
“Otandi ka longitha uunongo wadje okulundulula nokuyambula po oonkalamwenyo dhaakalimo yomoshikandjohogololo shaHangwena, unene aanyasha oshowo oomeme nootate ye li moongeshefa,” Nghinyengwile ta ti ngaaka.
Ta ti, okwa kutha ombinga methigathano lyuukansela opo a kwashilipaleke elunduluko ndyoka a hala oku eta moshikandjohogololo shaHangwena.
“Otandi ka kondjitha iinima ya simana monkalamwenyo ngaashi elongo. Otandi ka hwahwameka eyilongo lyopawungomba nokukwathela kehe gumwe ke na iilonga moshitopolwa shetu,” a popi ngaaka.
Omuulikwa i ithikamena okwa ti, otashi kala oshinakugwanitha she kutya kehe ngoka kee na iiyemo yokomwedhi ota kala ta mono oshikwiila shepangelo kehe omwedhi.
Ta ti ota ka tulitha wo omatenda gonetiweka momikunda ndhoka kaadhi na omakwatathano gopangodhi moshikandjohololo shaHangwena.
“Otandi ka gandja oopoloyeka dhuunafaalama woludhi aluhe, kukehe ngoka ta kala e na ehalo nena kape na omayimbo gasha,” a popi ngaaka.
Nghinyengwile okwa popi ta ti ota ka tunga uundama wokukwatela omeya gomvula ga longithwe kaakalimo poompito dha pumbiwa unene. “Iipangelo itayi kala uupyakadhi momikunda adhihe. Uupangelo uushona otawu ka tungwa popepi,” Nghinyengwile ta ti.
Ta yelitha ta ti elalakano lye olyokutula oshikandjohogololo shaHangwena pondondo yi li nawa nokulundulula ayihe yi kale yi li mondjila nomelandulathano.
“Itandi popi ashike nda hala okuulikwa ndi sindane, ihe shika otandi shi popi sha ikolela kwaashoka ndi na okuninga moomvula ntano ndhoka tandi ka lela,” ta fatulula.