Auleria Wakudumo 

ONGWEDIVA – Ngoloneya woshitukulwa shaShana Hofni Iipinge ponhele yombelewa yaye okwa yandja ekwafo lopashimaliwa shi fike poN$10 000 okukwafa ovakwanedimo vomukainhu weedula 38 oo a dipawa vati komukwashiwana waAngola. 

Oshiningwanima eshi osha ningwa Etitano, molukanda Oshoopola mOshakati, sha ningwa po18h00 lwaapo. 

Nakufya okwa tongololwa oye Helena Ester Ndinomuwa. 

Opolifi oya holola kutya omufekelwa oo e shivike ashike kutya omukwashiwana waAngola okwa twa nakuningwa oshihakanwa nombele oikando ivali ndele te mu shikulile po noku mu denga noluko lokuteleka. 

Nakuningwa oshihakanwa okwa tulwa moipandeko. 

Ngoloneya okwa holola kutya oshimaliwa sha yandjwa otashi ka kwafela okulanda oshikefa shanakufya osho yo emanya laye. 

Ombelewa yangoloneya oya yandja yo oikulya ngaashi: oufila wokandobo, omaadi okuteleka, eendooxa deeshi noushako veesopa okukwafa ounona vanakufya. 

“Nakufya okwa li omulandifi wokapana momapandaanda nokwa li ashike ta kendabala okulonga noudiinini opo a dule okupalufa ounona vaye,” Ngoloneya ta holola nenyeme. 

Iipinge okwa ti ombelewa yaye otai ka kwafa yo okufuta otuwa oyo tai twala omudimba keumbo lanakufya komukunda Ohakuyele moshitukulwa shaShikoto. 

Ngoloneya okwa holola kutya ombelewa yaye oya kufa etokolo okukwafela ovakwanedimo vanakufya konima eshi ve ya okukonga oukwawowananghali kombelelwa yaye. 

“Ombelewa yetu oi lile po okukwafela oshiwana, onghene otwa ninga etokolo eli opo tu kwafele ovakwanedimo va pake omuholike wavo,” Iipinge ta ti ngaho. 

Nakufya okwa li e na ounona ounona vatano. 

-wakudumoauleria@gmail.com