Ngoloneya woshitukulwa shaShikoto Sacky Kathindi okwa indila opo ovakalimo vomoshitukulwa shaye va ka waimine ovaNamibia aveshe mefiku lokuwapaleka olo tali ka kala ko omafiku 20 September 2025.
Okwa yelifa ta ti mefiku olo okwa teelelwa oshiwana koikandjohoololo ya yooloka mOshikoto opo i kale ya kufa ombinga okuwapaleka omidingonoko davo.
Edi okwe di popya meenghundafana va ninga nombelewa youministeli wouyelele nomakwatafano kOshitoko oshivike sha djako.
Kathindi okwa ti osha fimana opo omunhu keshe unene ovanyasha va kufa ombinga okuwapaleka eenhele davo shaashi oukoshoki owa fimana.
“Osha fimana ngeenge omunhu hadi pomudingonoko wa yela nawa,” ta ti.
Okwa weda po ta ti oukoshoki owa fimana natango shaashi otau kelele oshiwana shi ha kwatwe komikifi odo hadi dulu okuetwa kekako.
Okwa yelifa ta ti ekako oha li eta omikifi da yooloka.
“Ovanangeshefa tava landifile momapandaanda nokomatala navo ova teelelwa okukala va holoka momwaalu muhapu okukawapaleka shaashi oikulya oya pumbwa efimbo keshe okukala tai landifilwa ponhele ya yela nawa,” ta ti.
Ngoloneya okwa ti oukoshoki owa pumbiwa keenhele da yooloka ngaashi keefikola nokoipangelo.
“Onhele ngeenge oya yela nawa otai nane ovanhu opo va kale va talela po onhele oyo ashike onhele ngeenge oya kaka ovanhu itava va ende po,”ta ti.
Okwa kumaida oshiwana koitukulwa ya yooloka opo va kwashipaleke kutya eenhele davo oda yela efimbo keshe.