Auleria Wakudumo
Ngoloneya woshitukulwa shaShana Hofni Iipinge okwa yambidida ovanyanyamaulu mOshakati noitungifi yomalukalwa avo, oo a li a hanaunwa po kondalu yaNelyanga.
Ovanyasha ovo va pewa ekwafo ova dja molukanda Onawa osho yo Evululuko mOshakati. Ova pewa oitungifi ngaashi: oipeleki, omivelo, eepaala, oikonde naikwawo ya wedwa po.
Pefimbo ta yandje ekwafo eli, ngoloneya okwa holola kutya epangelo okupitila mombelewa yaye otali twikile okuyandja omakwafo moshiwana nokukwashilipaleka kutya Omunamibia keshe okwa mona ouwa weedjo doshilongo.
“Ngaashi Omupresidente ha ti, ‘it’s not business as usual’ osho sha hala ashike okutya oinima kayi li ngaashi ya li nale momapangelo a dja ko, eshi osho twa hala okutwala moshiwana nokukwashilipaleka kutya keshe umwe okwa mona ekwafo,” Ngoloneya ta holola ngaho.
Iipinge okwa holola kutya ombelelwa yaye oya yandja nale ekwafo lokutunga omaumbo moshitukulwa, komikunda nomedoolopa ongushu yoshimaliwa N$390 000 opo va dule okukwafa ovo ve lihanga ve li momhumbwe molwoiponga yopaushitwe ngaashi omindilo noshikungulu shomeva efundja.
Petrus Kadhila, umwe womovanyasha va mona ekwafo molukanda Pohamba mEvululuko okwa ti ota dimbuluka ngonghela eshi eumbo laye la pya po filufilu komundilo.
“Omundilo oo wa hanauna po eumbo lange owa etwa kemanya longodi olo la topa shaashi la li tali tyaatyele,” ta dimbuluka ngaho. Kadhila okwa holola olupandu okumona ekwafo okupitila mombelewa yangoloneya. Kadhila okwa ti eshi a ningilwa nashi ningilwe yo vamwe ngeenge tave ke lihanga ve li momhumbwe ya faafana. Natango, ombelelwa yangoloneya oya yandja yo ekwafo loitungifi koproyeka younamapya yovanyasha hai ifanwa Tulongeni Pamwe moshitukulwa.
Oproyeka oya mona oitungifi yongushu yoN$50 000 opo i dule okuwedela ko koshikunino shavo.
Oitungifi omwa kwatela: eendoloma dokukwatela omeva deelitela 10 000 mbali, eeshako deesamente, okaungulita-eeshako nhatu, odalate yokoshikunino, eepala 27 nounete vomudile woikunomwa.
Ngoloneya natango okwa waimina ovakwashiwana vomomukunda Oshilunga Shonghoshi moshikandjohoololo shaKatana opo va mone omeva momudingonoko.
Oule weedula, okavalimo vomomukunda omu ova kala nokweenda oinano ile, eekilometa da konda 10, okuteka omeva poushiinda. Ohava longifa unene kwa li endongi opo va fike ketambi nokudja ko noupu. Iipinge okwa ti ombelewa yaye oye lilongekida okukwafa keshe oo e li momhumbwe moshitukulwa.