Auleria Wakudumo
Ngoloneya woshitukulwa shaShikoto Sacky Kathindi okupitila moprograma yokukwafa ovanangeshefa vanini hai ifanwa oMicro Income Generating okwa yandja ekwafo loitungifi nomashina kovanangeshefa vanini vaheyali okudja koitukulwa ya yooloka mOshikoto.
Ngoloneya okwa yandja oitungifi noikwafifo imwe ngaashi eedalate, omashina okuhondja oikutu, eekila dokutalaleka, omashina okutunga, eendoloma domeva, omafiya okuteleka osho yo okundjeneka, oushina vokuteta ombelela naikwao ya wedwa po.
Aishe ei oya kosha ongushu yoshimaliwa shi fike poN$200 000.
Pefimbo ta yandje oikwafifo yovanangeshefa vanini, Ngoloneya okwa holola kutya ekwafo eli ola nhuninwa okukwafa nokushakeneka ovanangeshefa vanini ondjilakati moilonga yavo. Kathindi fatulula kutya oprograma yoMicro Income Generating oya totwa po nelalakano lokukwafa ovakwashiwana noitungifi osho yo omashina okuyambula po nokutota eengeshefa davo opo ve limonene oyuuyemo. “Oprograma ei otai kwafele okulundulula eenghalamwenyo dovanhu, okuva kufa kokuhaena oilonga vo va ninge ovanangeshefa ovo tava dulu okunyangadala omboloto yavo vene,” Ngoloneya ta holola ngaho.
Kathindi okwa ti ovanangeshefa vanini ngeenge ova mono ekwafo la wana, ohava kala ovo shikwetepo meedoolopa okuyambula po oxumokomesho. Okwa weda po ta ti oshi li oshinakuwanifwa shovaleli okukwashilipaleka kutya ovanangeshefa ova pewa omayakulo a wana. Ovanangeshefa ova kunghililwa opo va longife omashina noitungifi oyo va pewa ngaashi ya nhuninwa.
Ovo va mona ekwafo eli ova holola ehafo ngambishi meumbo mwa tomwa eshi va mona ekwafo eli. Vahapu ova ti eengeshefa davo oda li tadi shongola molwaashi kakwa li ve na oikwafifo ya wana.
Umwe womwaavo va mona ekwafo Theresia Geises weedula 32 okudja koshikandjohoololo shaGuinas okwa holola okwali ha longifa okila yokutalaleka oshoyo eshina lokutetifa ombelela lovanhu.
“Onda li handi pulwa ndi fute N$300 komwedi okulongifa oinima. Efimbo limwe ohandi pulwa ndi yandje ombelela opo ndi longife okila,” Geises ta ti. Geises okwa pewa eshina lokuteta ombelela oshoyo okila yokutalaleka opo a longife mongeshefa yaye yokulandifa ombelela. Mwene womukunda Okakunda-Amutenya moshikandjohoololo Onyaanya Petrus Nankulungu (62) naye okwa pewa ekwafo. Nankulungu okwa pewa ekwafo loikwafifohongo yomoshikunino shaye ngaashi ondoloma yomeva, odalate yoshipa, oshihalaka, okatololi, oshixupulo noilongifo ikwao. Mwene womukunda okwa holola kutya paife oilonga oye mu ningila ipu.
Okwa ti okwa li ha ka teka omeva odula neengoma opo a pungule okutekela oimeno yaye. Oikwafifo yomoshikunino okwa ti nayo okwa li ha iyi oilonga yaye moshipala shaashi okwa li heli yakula noilonga yomeumbo. Aveshe ova holola kutya etemo olina okuya momupini.
Ekwafoe li otali holola elongelo kumwe pokati kepangelo noshiwana. Ngoloneya okwa holola kutya okweli neekela kutya eengeshefa davo otadi xumu komesho op ova dule okukuta yoo ovanhu vakwao.
-awakudumo@nepc.com.na
