Jazema Hangero

Ondjira yehupo i hepa omutima omukukutu nombango onyingi. Kavenandangi ‘Pepe’ Karuuombe omuhongwa posikore yovinangongo indji College of the Arts ousupi Ocota ndjiri momaturiro wa Katutura ma tja.

U nonyuṋe kokutja u rihonga oviṋa mbya suvera komuinyo mbiri ovinangongo. Karuuombe u ri mombura ye osenina nu u rihonga okuperenda nokuungura ovinangongo pekepeke. 

Ombura ndji mai yende ma zeri okukaryamisa omahongero we komurungu kOunam. “Tji we rimunu kutja ko nomasa motjiṋa tjorive ho tjesira ovandu varwe ove u toore ondjira yarwe,” ma tja mo nao tja za nokupita mosikore ke rihahizire nungwari we kerikwamba kOcota.

Karuuombe we riyarikaṋa komitanda omikwao kutja ondjira osupi ndji ve kondja okutoora kandji ri yo. Nohepero omundu auhe okupaha okuritjiwa omasa nomayeneneno we. Ma munu kutja omitanda tji vye rimunu kutja kavi perwe osikore vi muna kutja oomayandero wouye. “Omitanda vi rihahiza tjimanga tjazumba vya suvera omahore omavi nge ha tungu nge ve pandjarisa omuhunga momuinyo nokuvetwa momaumba tjimuna okupuka oviṋa vyovandu.” Karuuombe ma tja. 

Ocota i kambura ovahongwa mba yandera mohamboumwe, ave rihongo omihunga pekepeke tjimuna okuperenda, okuungura ovinangongo (oviyaha nomakopi) nokuhonga ovinangongo pomiti, okukonda ozombanda, nouiisane. Omahongero ve sutirwa i yOnational Art Council. Ma raisa ounanḓengu wokuhikikwa otjoviṋa ovingi mouye mbya tanauka ovandu nai pu ve paha ouhatoi womahongero kutja ve ku vatere nozombatero poo ve ku kute moviungura. Mo nao otjeri ohepero tjinene omundu okuhara ozombapira zomahongero. 

Karuuombe ma tja oviungura vyovinangongo vi paturura ozondjira ozengi, mo yenene okuriungurira omuini, okukerihonga komurungu kozonganda tjimuna Ounam, Onust okarira Omiṱiri. Tjarwe okupaturura onganda yoye omuini yoviungura vyokomake okutu ovakweṋu. Pe nozonganda nḓe yandja ozombatero kovandu mbe kondja ouwa nomake wawo tjinene motjiṱo tjoviungura vyokomake tjimuna National Art Council nozongwao zarwe.