OLUNDJINDA – Aanamibia koombinga noombinga otaya indilwa opo ya lye ongungu pethimbo ndika oshilongo sha taalelwa koluteni.
Ndhika odha li dha popiwa kuSacky Kayone omukwatakanithi gwoSWAPO moshitopolwa shaMusati pedhimbuluko 29 lyemanguluko Olyomakaya ga za ko pOlundjinda moshitopolwa shaMusati.
“Epangelo lyetu olya tula po nale oshimaliwa shoka tashi ka kwathela opo shi taagulukithe aantu momumvo nguka gwa nika oshikukuta, onkene otandi indile opo omitima dheni dhaa nike uupongo molwomuloka omunkundi ngoka gu li gwa kwata konyala oNamibia ayihe,” Kayone ta ti.
Onkene ota indile aanambelewa mboka taya ka pewa oshinakugwanithwa shokutopola oondya ndhika opo ye shi ninge nohamu nonuuyuuki opo pwaa kale nando olye ta tapatekwa kuNakayidhi kaAlweenya.
Kayone okwa li wo a kunkilile aagundjuka yoshigwana shetu opo ya kale taya ihumbata nawa moondjila ta ti iiponga yiiyenditho oyi li ya lundalala naashika oshi li sha ninga omutondi gwemanguluko.
“Hingeni nawa yaholike opo tu hupitheni oomwenyo dhoshigwana shetu shoka ngashiingeyi shi li tashi manwa po kiiponga yinyanyalitha mbyoka ha yi inyenge koombinga noombinga dhoshitunda Namibia,” Kayone ta tsikile ko.
Okwa ti iiponga mbika oyi li ya ninga omutondi omunene gwemanguluko onkene aantu ayehe koombinga ne dhoshitunda Namibia oya pumbwa okwiimanga kumwe opo ya lwithe omutondi nguka ngaashi naanaa ya li yeshiningi pethimbo ndiyaka lyokakulumbwati.
Kayone ngoka a li nale ngoloneya gwoshitopolwa shaMusati ethimbo nuule okwa li wo a pe mo engungo ndyoka lya li lya gongala pehalandjandja lyepandaanda enene mOlundjinda nkene epangelo lyi li lya adha iilalakanenwa oyindji okuza pemanguluko, ngaashi oopate dha tungwa , omeya ga yela osho wo olusheno olwa andjaganekwa miitopolwa ayihe moshilongo.
Epangelo olya tunga oosikola niipangelo osho wo iiputudhilo yopombanda, elongo lyoshali okuza pondondo yotango sigo onti-12 ogo gamwe gomomasindano omanene epangelo li li lya adha muule womimvo ndhoka.
Okwa li a holola wo kutya onkalo yeliko lya gwa pevi ndjoka tayi dhumwa moNamibia oya guma uuyuni awuhe onkene Aanamibia naya hile kepaya manga iinima tayi galukile pomahala.
“Kwateni omaliko geni nawa ne yandeni okukutha oondjo dha pitilila, aanangesefa ngeshefeni shili mwi itula mo ne mu kwathele opo mu yululule ko komwiya gwokwaahena iilonga ngoka tagu londo esiku nesiku moshilongo shetu, aagundjuka indeni koosikola , kutheni ko omayele nuunongo opo mu vule okuhambudha mweete po iinima yi na ongushu, ta fatula ngaaka.
Kayone okwa li ta popitha engathithi enene ndyoka hali holoka aluhe pehalandjandja enene lya taakana Olundjinda , mwaashoka ngashiingeyi sha ninga omuthigululwakalo gwaalundjinda okutyapula esiku lyemanguluko oshinima shoka ya li ye shi ningi okuza tuu poshituthi shemanguluko lyotango sigo okeluwa ndika.
Oshituthi osha li sha kalwa koondjayi dhekondjelo manguluko, aanyasha osho wo aakulupe mboka ye li etungwa lya siikilila ombepo.
Konima yiipopiwa kehe ondjuhwa oya li tayi tondoka nehandja oshoka kehe omumvo pOlundjinda ohapu lala okatana.