Ehangano lyokutunga omagumbo lyoNational Housing Enterprise (NHE) olya tula miilonga oprojeka yokulonga kumwe noomalelo goondoolopa opo ya tungile aakalimo omagumbo kondando yili hwepo. 

Dhoka odha popiwa komunashipundi gwokangundumutima kaNHE, Toska Sem Etitatu sho kwali NHE ta gandja omagumbo 30 kaakalimo yokOmuthiya. 

“NHE okwa longitha oshimaliwa shi thike poomilliona N$5.7 okutunga omagumbo ngoka, naantu 70 okwali ya kutwa okulonga iilonga mbyoka oku za momundhingoloko,” ta popi ngaaka. Okwa popi kutya NHE ota kala ta longele kumwe nomalelo goondoolopa oku pewa omahala goku tunga ga longekindhwa opo ya vule okutungila aakalimo omagumbo kondando yili pevi. Ta ti, egumbo lyela limwe lyokulala otali kala tali futwa ashike N$400 komwendhi omanga ngoka gena omala gatatu tali kala tali futwa ashike N$1 200. 

“Oondolopa dhoka dhayi melongelo kumwe noproyeka yoNHE ndyoka ongaashi Swakopmund, Eenhana, Nkurenkuru, Rundu, Keetmanshoop, Mariental, oshowo Katima Mulilo,” ta ti ngaaka. 

Sem okwa indile wo oondolopa dhilwe dhi ye melongelo kumwe noproyeka ndyoka okukandula po omaupyakandhi gomalukalwa moshilongo. Ta ti nonande omagumbo oga pumba moNamibia, NHE aluhe ota kambandhala okuya po nomagumbo gongushu noge na ondando tayi vulu okwiidhidhimikilwa. 

Sem okwa fatulula kutya oproyeka ndjika kutya oya tulwa miilonga omolwa uuministeli womayambulepo goondolopa nokushayi. Uuministeli womayambulepo gwoondoolopa nokushayi owa ti, otau ka kala nokuyambidhidha kehe osheetwa po shoka tashi ka kandula po omukundu gwomagumbo moshilongo. 

“Inatu ipyakidhila unene nokuninga oshimaliwa tashi zi mevi lya nuninwa omalukalwa gaantu ihe natu nyanyukilwe eputuko ndyoka tali etwa koondoolopa dhetu komatungilo gomagumbo. Epungulo lyuulethimbo ndyoka tali ya po omolwa okudhika omalukalwe olya simana noonkondo koondoolopa dhetu shi vulithe oshimaliwa shoka tashi ya po osheendelela okupitila melanditho lyevi,” wa popi ngaaka momushangwa sho kwali wa indile oproyeka ndyoka yi tulwe miilonga. 

Uministeli owa ti, okupitila moproyeka moka oshigwana oshindji otashi ka mona omalukalwa omolwa ondando ndyoka yili pevi. vkaapanda@nepc.com.na