NKURENKURU – !Hū!nāsi Ommās ǂNûiǂgās (NHE) ge ǂoa ge wekheb di Denstaxtsēs ai !hūkhôas ǁaxasib 172 omde ǂnuwis !aroma Nkurenkurus, Kavangob Huriǂoas dis !nâ ge ūhâ i. 

NHEs di ǂnuwisa xūn omkhâisens !âb sîsenǂuira mâisab, Thomas Shilongob ge ge mî, ǁîn ge Tweya Consulting Engineersa ǁnā !ereamxasiba a māsa, kai ǀnōb !nâ nē omdi nî ǂnuwihe !khaiba !anu!anu tsî ǂgaoǀkhāsa !gao!gao !oabadi !aroma a aiǂhâbasa xūna sī-ūsa. 

“Sida ge !ā!nāsi ǀawemā!nans ǀkha hâ tsî kaise nē îxa sîsenǁareb tsî ǀasa omkhâisens xa a ǂkhî, kaise da ge nē projeks ǀkha tsoatsoasa !âuhâ i ǀnai da ge !hū!âde kurin !kharuhâse ǁ-amatoa hâ is a xui-ao.Nētsē da ge !hūkhôas ǁaxasiba ǂhanusise ra dī,” tib ge !nā ge mî. NHEs ge ǂguro tsî ge ǁkhāti ǀuniga !nā is ase 2017ǁî kurib !nâ nē !ās !nâ 286 omde Mass Housing Development Progammi di !âb ase ge ǂnuwi hâ i. 

“Nēs ǀkha da ge ǁnā !gôab ai ra ǀaro ǂgao, !hūb !nâ da ūhâ ǁgoaǂuis omn !nubusiba oe-ams dib ase, nē ǁgoaǂuis ǀgaisase danasa ra ǀhōǂui amaga. Nē ǀasa projeks ge NHEs di ǁguiǂgāsens tsî ǁgūbas ǁîs di ǂgaoǀkhās sîsenni disa dīǀoaǀoas di !â,” tib ge ge mî. 

“ǀGuitimî tsîb ga !anu!anus sîsenna a tsoatsoa, ob ge omde kurutsoatsoas sîsenni tsîna ǀguipa nî !khoeǀhao. ǁGuiǂuib ge N$1.2 miljunsa nî ǂgan. Nē !âb khao!gâ da ge mâtikō maris nî !oabade sī-ūs di tsî mâtikō marisa omde oms ai nî ǂhâbasa !khais !gôaga nî ǂanǂui,” tib ge ge mî. “!Nāsa !ā!nāsi ǂgaeǂguide da ge ra ǂgan, NHEsa !hūde ǀkhaesa îs ǂauna !gôab !nâ !hūb a ǂhabase omde kuru tsî nēs !nâ-ū omosib mâsib !hūb !nâ hâba oroǀoro ǁkhā. 

Mûsa i a khami da ge nēsi omai !hūs ai mâ, tsîs ge projeksa nēsi ǀgui ra ǁnāǂgō. ǁGuiǂuib !âb ǀkha da ge nē Hôasoreb nî ǀams ai!â ra toa ǂgao. Omkurus projeks ge !goaxa kurib !Khanni ams tamas ka i o !Khanǀgôab di tsoatsoasa ǀaweǁguibahe hâ tsî -ǁaupexa hû ǁkhâgu ǁaeb !nâ dītoahesa ra !âubasenhe.