Ofamili yaSalom Nicanor (41) ou vati a dipawa ndele ta tetwa oilyo youlumenhu waye kukaume kaye oya ti mboli Nicanor okwa li ashike a shangifwa eemwedi mbali mehangano olo hali yandje oshimaliwa shokulongifa peenghali. 

Naashi osha eta opo ofamili i kale inai pewa ko oshimaliwa shaashi mehangano ina ninga mo efimbo. 

Ova hokolola tava ti ova ninga onghendabala yokuya keembelewa dehangano eli tali tongwa kutya Nicanor okwa shangifwa kukaume kaye kwa li. 

Nicanor ota fudikwa mongula komukunda wavo. 

Ofamili otai pula moshiwana opo shi va yambidide nomakwafo opashimaliwa okuninga efudiko. 

Ofamili onghela oya popya kutya ovakwapata vomulumenhu au vati a dipaa Nicanor oye va pa ongobe osho yo oikunwa. 

“Kaimba natango opo tave uya oku tu yambidida noshimaliwa,” Tabitha Salom, omukwapata waNicanor ta ti. 

Ofamili oya yelifa tai ti ova taalela eshongo loshimaliwa okulongifa peefya shaashi nakufya ka li e na oyuuyemo yasha. 

Oshivike sha dja ko ofamili okwa li ya ngudumana komhangu yaMangestalata mOndangwa tai ti omutamanekwa ina pewa obooloha. 

Omutamanekwa weedula 25 Andreas Sunday Kanyanga okwa anyenwa omhito yokulifutila mo modolongo pefimbo a holoka momhangu yaNdangwa oshivike sha dja ko. 

Oshibofa shaye osha undulilwa komafiku 18 Juni 2026 opo ku ningwe omakonakono omoule. 

Opolifi oya hokolola tai ti omufekelwa ou vati konima eshi a teta ko oulumenhu wamukwao okwa ya nayo keumbo lavo ndele teu xwike po nokonim okwe u fudika meumbo lambulavo. 

Olutu laye ole lituwa li li metale lomeva onyata, Osoondaxa shomafiku 3 neudo, efimbo longula modoolopa yaNdangwa komukwashiwana kwa li ta ende ponhele opo. 

Omukulunhu koshikondo shokukonakona oimbuluma wopolifi moshitukulwa shaShana omupedu komufala Fredrik Ndjadila okwa koleka oshiningwanima eshi shinyanyalifa. 

Opolifi oya hokolola tai ti Nicanor ou okwa hangika a kupulwa metale lomeva ashike okwa tetwa eefukwa odo di li koilyo yaye youlumenhu. 

Otaku hokololwa kutya omufekelwa vati okwa shangifa nanakufya ou a li kaume mehangano olo hali shangifa ovanhu okupewa oshimaliwa shokulongifa peenghali ngeenge omunhu a xulifa. 

Opolifi oya hokolola tai ti konima eshi omufekelwa a ningilwa omapulapulo okwa popya kutya okwa dipaa kaume kaye shaashi okwa hala oshimaliwa osho ha shi yandjwa kehangano olo. 

Umwe womukwapata wanakufya okwa lombwela Kundana ta ti okwa kumwifwa koshiningwanima eshi molwaashi omufekelwa okwa li ve na oukaume muwa nanakufya. 

“Okwa li alushe hava ende ve li lamba va uka keendingosho. Ohatu anye okwiitavela kutya omufekelwa oye a longela kaume kaye omunyonena ou shaashi okwa li ve na ekwatafano liwa,” ta ti. 

-fhamalwa@nepc.com.na