Sylvia Hashondali
Konyara yilyo yokusika ko ntazimwe kavakere wokutunda komuhoko gomununu ava nawo kavayalihameseremo mepongo lyountazimwe lyovanona mombongarero zanavenye. Eyi kayigeve ministera gona gakarerapo muhoko gomusesu vaninkiliramo, Royal /Ui/o/oo moune wakapita posiruwo opo kakahiuyungisire vanona vana kara ngesi mombongarero zanavenye omu nawo navagwedako ezwi lyawo mokutwara sirongo saNamibia komeho.
//Ui/o/oo katente asi pana kara mulyo unene kutjindja vahavatumbura hena asi muhoko vaninkiliramo nye vakare nye asi vatungimo wovasesu. Omu nye natunkondopeka muhoko ogu guna kara asi vasesu, nawo vagwanenemo uwa moekonomi.
Ame kuna kumukorangeda asi mwahepa kusikama pwanyamweni, tomuhuyunga yipo muretesepo malitjindjo gokomeho,’’ yimo ana kutanta /U/o/oo. Mukukumbururako komagano aga nye kavakere nago vanona mombongarero zanavenye, omu vana kuyimona asi vanona vamwe vana kuninkiliramo monkarapamwe ‘’ omu vana kupira kugwana Harambee’’ , /Ui/o/oo yimo ngoso ana kutanta asi vaduni kuna kugwana nondja kepangero ntani hena kugwana nondja dorukukutu dina kutunda kepangero. Kuhamena nye mpo mokuziruganesa, vanona vaninkiliramo, /Ui/o/oo katente asi kolili elikwamo lina karako, omu tuna kara asi kuna kupopera vanona, yipo asi vaha rugana eyi vana kurugana ava vaninkiliramo pwanare, one mwahepa kutupa tupu mapuro, ose nyose ava kuna hara nose tulirongereko kweni.
‘’ Ame kuna kurugana unene yipo asi muhoko ogu vaninkiliramo gwahepa kugwanenamo mauwa meyereko lyosimaliwa eli lyo 2024/25. Ame ngesi kuna tura erongo pelikwamo lyange asi sokuhova, ose tuna kara novarongi vakara asi kwatundilira kombunga nye ezi zina kara asi kwavaninkiliramo, yipo nye tukare noumbangi,’’ yimo ana kutanta ngoso. Vamwe vahamenimo wombunga ezi zovanona wombongarero zanavenye kavageve magano gawo, moutatu unapuko omu sinzi sawo kavahuyungire kuhamena erongo kovanona womoNamibia.
Munasipundigona gombongarero zanavenye govanonagona ava, Michael Ajiboso, nampili ngomu yina kara asi yinzi garugana ministeragona ogu, simpe yinzi yina pumbwa kuyirugana omu yina kara asi vayirugane kuhameseramo nombunga edi dina kara asi kwatunga mosirongo nawo vahamene mokutura matokoro. Epongo eli lyauntazimwe, lyombongarero zovanona, kalihege mioutano, awo unene kavayaliyongere yokuhamena erongo neyi yina vagumu moNamibia ngovanona gona. Elikwamo eli kwalitulisapo nomvhura 17, dina kukapita ngesi, mbongarero zova nona gona ava kwakara asi mpito omu navalihameseramo mongendeseso zoudemokoli ntani valironge asi ngapi pomu ava tulisapo noveta ntani vatare asi maudigu musinke vana kugwanekera nago. –Nampa