Omupresidente Netumbo Nandi -Ndaitwah okwa kumagidha oshigwana shi hinge nuukeka okuyanda iiponga osho wo okuhupitha oomwenyo dhaantu pethimbo ndika lyomatango omanene. 

Opolisi osho wo ehangano lyo- MVA Fund oya ningi esiku taya kumagidha oshigwana shi hinge nuukeka ethimbo ndika. 

“Ethimbo ndika Aanamibia ohaya kanitha oomwenyo okupitila miiponga yiihauto, omolwokuhingilila, onkene otandi kumagidha mu hinge nawa pethimbo ndika,” ta kumagidha ngaaka. 

Omupresidente okwa kumagidha wo aahingi ya simaneke omandhindhiliko gomoondjila. 

Ta ti, ngele taku hingwa nethimbo niiponga ihayi holoka. 

“Otandi mu halele okrismas nomumvo omupe gwa yambekwa,” Omupresidente ta ti ngaaka. 

Omukuluntu gopolisi moshitopolwa shaShana Naftal Sakaria naye okwa kumagidha oshigwana ta ti, aayendinandjila taya ka talela po aakwanezimo yawo kiitopolwa ya yooloka, naya longithe nawa omandhindhiliko gomoondjila okuyanda iiponga hayi holoka unene pethimbo ndika lyokili. Sakaria okwa kumagidha aahingi kaaya hingilile, yo yaaha hinge ye li kohi yomalovu nenge ya vulwa. “Omimvo dha piti, pethimbo ndika lyomatango omanene, oyendji oya kanithile mo oomwenyo dhawo, ihe olundji ohashi holoka molwokwaalandula omandhindhiliko gomoondjila,” ta ti ngaaka. Ta ti, okuhingilila itaku ti okuthika. Nonando oto hingi kashona owu na okuthika ashike, omolwegameno lyoomwenyo mwa humbata mohauto yoye osho wo dhayakweni ye li wo moondjila. 

Sakaria okwa ti, oshitopolwa shaShana osha ilongekidha okulwitha iimbuluma pethimbo ndika, onkene itaya ka pitika nando omuntu ta ka konda nenge ta ka teya oompango adhihe dha tulwa po. 

“Ngele oshigwana osha landula oompango adhihe dha tulwa po, nena kape na nando uuwinayi washa tau holoka. Ethimbo ndika olyokunyanyukwa ihe kali shi lyokukala momaluhodhi,” ta kumagidha ngaaka. 

Opolisi yaNamibia okupitila miikundaneki ya yooloka oya kumagidha wo aahingi yiihauto, ya hinge nuukeka osho wo okugwanitha po oompango dhomoopate. 

Ta yiti, uuna oshiponga sha holoka mondjila dhenga konomola yopolisi 10111 nenge MVA 9682. 

Natango oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga ooyene taya ka talela po kiitopolwa yimwe. 

Opolisi oya kumagidha omagumbo ga kale ge na omukeeleli ethimbo alihe, osho wo ga kale ga tema pondje, ethimbo lyuusiku. 

“Omutenya omalamba naga kale ga dhima oshoka aafuthi ohaya hilwa komalamba shoka tashi ya pe kutya kamu na omuntu megumbo,” tayi ti ngaaka.-vkaapanda@nepc.com.na