Omupresidente Netumbo Nandi-Ndaitwah okwa ti, aakwiita yetanga lyegameno oyo ethano tali ulike ongushu yoshilongo nokwa pandula omayakulo ya kala nokugandja pethimbo oshilongo sha li sha taalela omaupyakandhi. 

Omutse gwoshilongo okwa popi ngaaka pethimbo lyoshiindingili shetanga lyegameno sho lya tyapula esiku lyalyo Omaandaha koGroetfontein. 

Ta ti, aakwiita oya kala nokugandja omayakulo gongushu pethimbo lyefundja melongelokumwe nombelewa yomuprimaminista okukwashilipaleka kutya oshigwana oshi na ashihe shoka tashi pumbwa opo shi hupe. 

“Natango etanga lyegameno olya dhana onkandangala onene okweenditha olutu lwomupresidente gwotango gwaNamibia Sam Nujoma oshilongo ashihe, sigo esiku lyahugunina,” ta pandula. 

Nandi-Ndaitwah okwa kumagidha wo aakwiita ya kale aluhe uupathi noya iilongekidha ethimbo kehe uuna taya tumwa ya ka kalele po oshilongo. 

Ta gwedha po ta ti, aakwiita naya itule mo mokuhulitha oshilongo koomaupyakadhi taga taalele oshilongo. 

“Otandi kumagidha aakwiita ayehe yi itule mo miilonga yawo, nokwiikaleka kokule niilonga inayi uka” ta kumagidha. 

Ta ti elalakano lyaakwiita okukaleka po oshilongo shi na ombili nelandulathano. Nandi Ndaitwah ta ti, epangelo otali tsikile okuyambidhidha uuministeli wetanga lyegameno poompito adhihe. 

Presidente okwa pandula iilongo mbyoka ya kala mekwatathano nokuyambidhidha oshilongo shaNamibia uuna sha taalela onkalo ondhigu. 

“Etanga lyegameno olya totwa po kaakiintu naalumentu, mboka oonkondo dhawo nohole ye na noshilongo dhe etitha ombili kukehe Omunamibia,” ta popi ngaaka. Ta gwedha po ta ti, okuza esiku lyekondjelomanguluko, ombepo ombwaanwa osho wo eitulomo lyokugamena uuwanawa wOmunamibia olya kala lya simanekwa nolya dhidhigininwa. 

Nandi-Ndaitwah okwa kumagidha wo aakwiita ya kale ye na elongelokumwe ewanawa. 

Aakwiita yaNamibia yoombandi dha yooloka oya li ya gongala esiku ndyoka niilyo yetanga yegameno oya ulike uunongo wawo sho taya hingi oondhila, okunuka momambanda osho wo okusaluta. 

Aakwiita ya za kiitopolwa yilwe yoshilongo, oya li ya tyapulila pamwe esiku lyawo. 

-vkaapanda@nepc.com.na