Omukulunhuwiliki wokakomishi kokukondjifa oulingilingi koACC Paulus Noa okwa kumaida ovanyasha opo va longele kumwe okukondjifa oulingilingi moshilongo.
“Ovanyasha ovo ovaleli vokomongula, osha fimana opo va kondjife oulingilingi shaashi oulingilingi otau teya po oshilongo,” ta ti.
Edi Noa okwe di poppya Omaandaxa pefimbo kwa li ta patulula eembelewa dokukondjifa oulingilingi kodoolopa yaRundu.
Efiku tuu olo oshiwana okwa li va hooloka okudimbuluka efiku lokukondjifa oulingilingi mounyuni.
Efiku okwa li la dimbulukiwa koshi yoshipalanyole “Ovanyasha tava hangana okulwifa oulingilingi”.
Ombelewa ipe ya tungwa otai ka yandja omayakulo koshitukulwa shaKavango East, Kavango West noshoyo oshitukulwa shaZambezi.
Noa okwa ti ovanhu otava ka longifa omhito ei paife okukala tava ka lopota oulingilingi tau ningwa momidingonoko davo.
“Ombelewa yange otai twikile okuninga oikonga koitukulwa ya yooloka kombinga yokulwifa oulingilingi noshoyo okuxwaxwameka oshiwana,” ta ti.
Noa okwa yelifa ta ti oulingilingi ou na oshidjemo shii molwashi otau eta onghalo yokuyandjaneka omayakulo tai shuna pedu.
“Oulingilingi otau shunifa pedu eliko loshilongo noshoyo okueta onghalo yokuhe na oilonga ya londa pombada,” Noa ta ti.
Okwa weda po ta ti oulingilingi otau eta oshiwana shi kanife elinekelo movaleli vopapolitika molwashi ovanhu otava kala va lulilwa konghalo youlingilingi tai etele ashike ovanhu vamwe omauwa.
“Ovawiliki komahangano a yooloka noshoyo ovanhu ve li meembelewa dapashiwana koikondo ya yooloka nava kwashipaleke kutya itava longifa oulingilingi,” ta ti.
Okwa ti omunhu keshe, omahangano opaumwene, ovatoolinghundana noshoyo ovanangeshefa ova manguluka okulopota oulingilingi.
“Natu longafaneni nghene oulingilingi wa nyika oshiponga. Natu topolafaneni ouyelele kombinga youlingilingi molwashi ou omukalo muwa wokutunga Namibia,” ta ti.