Paulina Ndalikokule
Omupopiliko gwehango lyokwaandjakaneka olusheno monooli lyoNored, Simon Lukas ota indile aalongithi yomayakulo gawo mboka ye li konima niifuta, ya fute oondjo dholusheno manga Omaandaha 17 Juni inaga thika. Lukas okwa lombwele Kundana kutya oya tokola oku ka teta ko olusheno lwaantu ayehe ye na oondjo dhili konima nomasiku 30 nenge ge vule po. “Mboka ye na oondjo otaya indilwa opo ya fute mokuudha nenge ya talele po oombelewa dhaNored opo ya vule okwaadha etsokumwe lya nkene taya ka futa oondjo dhawo manga omasiku ngoka inaaga thikana oshoka ngashiingeyi otaya longitha olusheno oshali,” Lukas a ti ngaaka.
Okwa ti nonando ita vulu okukoleka kutya otaya ka teta ko aayakulwa yangapi, etokolo olya ningwa opo ehangano lyolusheno lyi vule okutsikila nokwandjakaneka olusheno kaayakulwa, naamboka taya ka dhiminwa olusheno oomboka owala taya ka ndopa okufuta uule wethimbo sho ya kala ya pewa olusheno yo taya futu komwedhi. “Mboka haya landa olusheno taya futu pethimbo itaya ka kwata nando kondhime ndjika oshoka kaya vula okukala noondjo,” Lukas ta ti. Ta yelitha kutya ope na aantu mboka haya ningile omiyonena oopala dholusheno yo taya yaka ko oongodhi dholusheno. “Uulunga owo unene hawu eta ondhime yolusheno inaashi longekidhwa, otandi indile aantu mboka haya ningi omiyonena ndhika ye dhi hulithe po oshoka ohaya etele ehangano naayakulwa yetu omaupyakadhi ogendji,” a ti ngaaka.
Oshiwike sha za ko mOngwediva omwa yakelwe ongodhi dholusheno shoka sha etele ondhime yolusheno uule wethimbo mondoolopa moka.
Lukas ota ti, aakwashigwana oya pumbwa oku sa oshimpwiyu yo ya lopote aantu mboka haya ningi omiyonena ndhoka.
-ndalikokulep@gmail.com