Festus Hamalwa
Omupresidente wotete noku li Xe Yoshiwana shaNamibia Dr. Sam Nujoma okwa tumbalekwa mefiku ledalo laye omo ovanhu ve dulife 3 000 mwa kwatelwa ovaleli veendodo da yooloka va li va ngudumana kEtunda tava tyapula edelo laye mexuliloshivike.
Nujoma okwa wanifa eedula 94, okwa dalwa momafiku 12 May 1929 momukunda Etunda moshitukulwa shaMusati.
Okwa tumbalekwa nomaano a pewa kovanhu va yooloka mwa kwatelwa oonakulwa vakulu noshoyo ongudu yoSwapo. Ovapopi va yooloka ova ndjandjukununa Nujoma tava ti omulumenhu omunanghono, omukondjelimanguluko woshili a longa nondjungu okweeeta po emanguluko laNamibia. Nujoma okwa hokololwa onga omutwe mepata lavo, oshiveli kuxe naina, omulumenhu a kala ta xwaxwameke ovakwaita pefimbo loita nelalakano Namibia a manguluke.
Moshipopiwa shaye a Hage Geigob okwa hokolola ta ti Nujoma omukondjelimanguluko woshili molwaashi okwa longa nondjungu fiyo Namibia a manguluka.
“Otwa pandula Nujoma eshi e tu kwatela komesho pefimbo loita. Okwe tu palela ondjila opo nafye tu kale ovakondjelimanguluko voshili. Nujoma okwa ulikila ovanyasha nounona oshihopaenenwa shiwa opo navo va kale oveleli vokomongula,” Geingob ta ti.
Geingob okwa ti Nujoma okwa longa nondjungu okukala e kwetele komesho ongudu yoSwapo pefimbo loita noshoyo okukondjifa eembulu nokatongotongo moshilongo. Moshipopiwa shaye, Nujoma okwa kumaida ovanyasha nounona opo va twikile nokulesha ondjokonona yaye molwaashi osha fimana opo ve lihonge kombinga nghee Nujoma a dana onghandangala pefimbo loita fiyo Namibia a manguluka.
Nujoma okwa pandula aveshe va yambidida oshitufi shedalo laye noshoyo oshiwana eshi kwa li sha holoka momwaalu muhapu okutyapula edulo laye. Pefimbo ta popi ponhele yovadalwa, Uutoni Nuyoma okwa tanga xe ta ti, Nujoma okwa ulikila ovana oshihopaenenwa shiwa, oku va longa outeku noshoyo okukala ovaleli tava yakula oshiwana.
“Ohatu twikile okulandula meemadi datate. Otwa hala okukala oveleli voshili ngaashi naaana tate a kala omuleli muwa okudja pefimbo loita fiyo Namibia a manguluka,” ta ti.