Auleria Wakudumo
Minista wotete wehongo moNamibia Nahas Angula okwa holola ta ti okwa li va tala Omukokolipresidente Sam Nujoma ongaxe. Angula okwa ti inava kanifa ashike omuleli muwa, ndele ova kanifa yo ependa.
“Nujoma okwa xulifa ashike oidjemo yoilonga yaye otai kalelele. Okwa eta po nokwa fiya po ombili moshilongo, okutukulilafana, nelongelokumwe. Ngeenge otwa landula omulandu oo a fiya po, nena ohatu ka kala tu li moshilongo sha xuma komesho,” Angula ta ti.
Angula okwa hokolola ta ti ota dimbuluka oshikando a shakena lwotete nomukokolipresidente, va shakena tete mo1966 moZambia ndele te mu tu mu a ka kongholwe momutwe opo e uye a yandje ehongo kOvanamibia.
“Okudja kelihongo lange, onda ninga hamushangadjai womauyelele moSwapo okudja 1980 fiyo 1982. Onda kala nda kwatela komesho ehongo kombada osho sha eta Nujoma a ningenge minista wehongo,” Angula ta ti.
Angula okwa holola ta ti oshilongo eshi sha manguluka, Nujoma okwe mu ninga minista wotete wehongo molwoilonga yaye.
Angula okwa weda po ta ti okwa kanifa omuleli woshiwana, omuyandjimayele muwa.
“Nomefimbo eli Nujoma a dja ko koshipundi, okwa kala omuyandjimayele muwa koopresidente ve mu landula osho yo oshiwana shaNamibia,” Angula ta ti.
Angula okwa holola ta ti Namibia ota kala momake mawa ngeenge oshilongo osha landula eenghatu nondjila oyo Nujoma a fiya po.
“Nujoma okwe tu fiila ombili, elongelokumwe, okutukulilafana, nohole. Ngeenge otwa landula aishe oyo e tu fiila nena ohatu ka kala twa uka komesho atushe,” Hangula ta ti.