WINDHOEK Ondundahangano yomahangano gaaniilonga moNamibia -( National Union of Namibian Workers – NUNW) oya londodha kutya oshigwana otashi vulika shi kanithe eineekelo mOkomisi yOkuvudha mo Uulingilingi (Anti-Corruption Commission) ngele otayi tsikile nokukatukila ashike aantu mboka ya longa iikoya iishona na inayi kitakana. Mokupopitha oshigongi shiikundaneki metiyali, AmushangaNdjayi goNUNW Evilastus Kaaronda ota ti ngele onkalo yopethimbo ndika osho tayi tsikile ngeyi ethimbo ele inaa shi pumbiwa, oshigwana otashi vulika shi ka kanithe eineekelo kosheetwapo (okomisi) ndjoka kwa li ya talika ko ya totwa po okuvudha mo iilonga yuumbudhi moshilongo. Dhika okwe dhi popi shi ikwatelela kiiningwanima iyali yekwatopo lyaafekelwa yotango koACC, moka amushanga posikola yedhina People’ Primary School mOvenduka ta tamanekelwa iipotha iyali yuufuthi woshimaliwa shoshigwana shokapandi koodola N$10 220. Oshipotha oshikwawo osha kwatela mo omuniilonga mUuministeli wUunamapya, Omeya nOmakuti, moshikondo shegandjo lyomeya gokomikunda ngoka taku tiwa okwa lya oshimaliwa shaanamikunda shomuyalu ngaashi N$ 1 400; N$1 200 oshowo N$1 000. Kaaronda okwa londodha kutya ngele oACC itayi lundulula onkalo moka yi li nokuhuma komeho okuungaunga niipotha yuulingilingi mbyoka ya kitakana, nena otayi ka kanitha esimano naashika itashi ka kala nawa monakuyiwa moNamibia. “Okwaapopya sha kiizemo yi nasha naashoka sha monika po kuukomisi womapulapulo, mboka wa kotha oshiketha shEpangelo iimaliwa oyindji noonkondo, otashi ti okumenena omukundu ngoka twa hala okukondjitha.” Kaaronda ota ti Ongundumutima yoNUNW ndjoka ya gongalele eti 24 Juni oya tokola kutya oonkatu adhihe tadhi pumbiwa odhi na okukatukwa muule wethimbo andola efupi ngaashi tashi vulika okukonakona omishangwahokololo dhuukomisi womapulapulo dhoka dhi li po, mwa kwatelwa Uukomisi yOpaupresidende. “Omauyelele gi ihwapo oge na okugandjwa kushoka sha monika po nenge shoka inashi monika po shi nasha niimaliwa yoNDC/ODC oomiliyuna 100 dhoka dha kana oshowo iiningwanima yilwe yuudhudhu.” AmushangaNdjayi goNUNW oti indile wo pu totwe omakwatathano pokati koNUNW noACC. “Oproholama yomadheulo yopamuhanga oyi na okuningwa koNUNW noACC ndjoka tayi ka dheula aakalelipo yaaniilonga momahala giilonga ongaalondodhi – nenge aahikihiya ye nasha niiningwanima yuudhudhu mbyoka tayi inyenge momahala gawo giilonga.” Kaaronda okwa kundaneke aakundaneki kutya Ewiliko lyOpombanda lyoNUNW olya ninga ishewe etokolo – osheetwapo ku ningwe omakonakono gomuule kombinga yiilonga yOngopolo Mine. Ota ti omakonakono ngaka itaga ka shoneka omuntu gwontumba, kakale otaga ka nikanika ashike olutuhangano ndoka ku monike kutya oshike sha etitha embangoloto lyomina. “Ewilikongundu (lyoNUNW) olya nyanyukwa okumona olopota okuza koMUN tayi ulike eyambidhidho li ihwapo lyewilikongundu lyawo okukutha ombinga momakonakono ge nasha niinima ya guma Ongopolo Mine.” Kaaronda okwa popi wo paufupi kombinga yeiteeko lyoNantu noMUN mokongessa ya zile ko, ta ti ewilikongundu lyoNUNW olya koneka oshiningwanima shoka, oshowo kutya aawiliki ashike aashona yomahangano ngoka yi iteekele mokongressa ihe kashishi omahangano goyene ngaashi tashi popiwa miikundaneki yimwe. “Nantu ongehangano ina ninga nando etokolo okukaleka manga iifuta ye koNUNW, kakele shika osha li ashike etokolo lyayamwe mboka inaya pewa uuthemba oku shi ninga.”