Kampani ya Namibia Wildlife Resorts (NWR) ilatuzi maikuto ane afitisizwe kimueteleli wa kopano ya Affirmative Repositioning Job Amupanda, kuli ibata kulekisa libaka zateni zamalobalo ni maikatulusezo. Zeo kaufela litaha kasamulaho Amupanda naile famakepe asicaba, abulela kuli NWR ilela kulekisa libaka ze 14 za mafitelo kapa maloji zeluilwe ki mubuso mwatasa kamaiso ya NWR. Ili taba yene tisize lipilaelo kwa babeleki ba NWR.

 Amupanda naize mulelo wakulekisa ukalile kale. “Kakukala baka keta muelezi yaka lifiwa lule lwa masheleñi,” nabulezi mwa manzwi ane aikabezwi famakepe asicaba. Mwa manzwi akampani ane ahatisizwe viki yefelile, muzamaisi yomuhulu wa NWR Mathias Ngwangwama naize hakuna buniti mwa likakalezo zeo. “Nibata kukolwisa babeleki kaufela ba NWR kuli hakuna mulelo wakulekisa maloji a NWR kapa kwa tambeka kubasili. Zeo ki likakalezo zesina bupaki bwa niti mi lisike za bilaeza babeleki,” nabulezi.

Napatalalize kuli kuna ni mulelo obata kunyatisisa ni kutatuba kuli kampani ieza hande cwañi nikuli izwelapili cwañi. Kono Amupanda nasiala akumalezi kwa manzwi ahae, kasamulaho asitatimende seo. Sibuabui wa NWR Nelson Ashipala nalatuzi likakalezo zeo mwa sikwata sa WhatsApp sa babeleki. Lipiho zeo litaha kasamulaho NWR nefumani kekezo yabolule bamashumi amane kabasilezi (N$46 million) mwa silimo sa 203/2024.

 Kusupeza petuho yetuna kwa sinyehelo ya bolule bamashumi amalalu kabaketalizoho (N$35 million) mwasilimo sa 2022. Kekezo yende yeo netile bakeñisa kueza hande mwa litaba zakufumana masheleñi kwa malobalo ni mafitelo akampani, kulekisa lico hamoho cwalo ni lisebelezo zeñwi zengungana kwa litaba za bupoti.