Kuvee Kangueehi OMONGUA O uhena wo meva, otjimariva, omatuwo womahongero no matuwo ngehepa okutunwa oo mitjemo mbya yandjerwe iyo vature va Kazize na Mongua koruhindo rokomiti yondjuwo yozoveta ndjina otjina no matunduuziro wo vaungure no mbwisiro no mekurisiro wotjiwana ndja karyangerere ovirongo imbi Omandaha. Po mbongarero muno pokati ko komiti indji no zomitiri no tjirata tjoskole indji yo mautiro o Motsomi, omitiri okuza koskole indji ya raisire kutja oskole indji yahingi no uhepe wo meva okuza ku Rozondu ombura indji. Wa raerere okomiti indji kutja ovanatje mbetei po 500 vatunwa iyo ouhepe imbwi nu vehepa kutja vekateke omeva wo kurikoha no kutereka. Watjere o uzeu imbwi wa raisiwa komberoo yo rukondua nu wina ko ngooneya posyo ngamba kave yavaterwa. “Eziriro ndituapewa uriri okoo kutja kapena otjimariva tjo kuungurisa omboora.” Omitiri indji ya raisire kutja o uzeu wo mboora imbwi wahingi ozombura nu ihepa o N$70,000 oku yiungurisa. Posyo omunane wokomiti indji, Elia Kaiyamo, watjere wahimisiwa iyongaro indji mena rokutja motjimariva tjombura tjo horomende pakwizikwa o N$50,000 tjo kuungurisa omboora indji. Watokere omitiri indji oku kongorera otjina ihi okutjiwa kutja pakaenda tjike. O uzeu warwe mbwa raisirwe ko komiti indji yari ongaro omatuwo womahongero nozondjuwo zarwe poskole yombutiro o Hosea Kutako muzeri. Otjiuru Lazarus Kaapama wa raisire kutja nganda oskole indji yatungwa mo 1974 ka i yarora okutungururwa no mita no tuiho tutuatauka otjiraisiro tjokutja kakutarewa. Watjere oskole yaningira o Ministeri yOvyungurwa, Ovitoore nOvihakaenise okupitira mo Ministeri yOmahongero posyo ngaa kundinondi ka i yamuna ombatero. Nandarire kutja ozondjuwo zehepa ombango watjere ovo kavena ouhepe womatuwo womahongero nu nai omatuwo tjiva ka yeungirisiwa. Watjere oskole ya tungirirwe ovanatje o 900 nu mena ro zoskole zarwe ndapaturuka mo rukondua, oyo nai ina ovanatje o 500 uriri. Ovahongwa ovengi mbe ha tuurunga i warwe wo uzeu mbwaraisirwe, tjinene poskole yokombanda yokehi o Rietquelle. Ozoperesende nderi kombanda yo 50 uriri zo vahongua vondondo yomurongo poskole indji ombe tuurunga. Otjiuru Jan Katjiuongua watjere otjipo ovahongwa oku tuurungisiwa nandarire kave yayenena okuvaza ondondo o itja kwao. Watjere o Ministeri maihepa okuripurira kotjina ihi. Katjiuongua omayerero wovahongwa kondondo yarwe ndandarire kutja kaveya yenenena oo mutundu wpmba wokuhina kutuurunga kovahongwa pondondo oitja murongo. Watjere ozoskole zo kozombanda kazenana ovahongwa ovawa mena rokutja ovo vetupuka kozoskole zovihuro. “Ozoskole ozengi zovihuro zeningira ozongombe zokombanda okuyakura ovahongwa nu potuingi ovahongwa ovingundi otji vekeura mozoskole zo kozombanda.” Okanepo ko Swapo mOndjuwo yOzoveta nokanepo kokomiti indji, Peya Mushelenga, wayendekere kutja ouzeu wa Mongua wasana nouzeu motukondua tuarwe. Watjere tjinene okomiti yakendisirwe iyongaro ya Kazize ovahongwa vo zondondo mbari peke peke puve hongerwa pamwe metuwo rimwe. Wayanisire kutja otjina ihi kena kutjesira imbo metjivasisa ko Ministeri yo Mahongero.