Omuhaamise wOrutu rwOtjiwaṋa Rwourunga wOvinamuinyo, Ocommunity Against Stock Theft Organisation (Ocaso), Hionganda Nanḓa Murangi, ma ningire ovaṱuta okukara netweho oruveze rombura  tjinga omarunga aya yenge otuveze tjimuna omarindi nozondama okuvakera po ovinamuinyo. 

Murangi mehungi ku nOnampa wa yendekere kutja ovaṱuta ovengi ve kambura kutja ovinamuinyo vyawo mokuti porumwe ku mavi ri oruveze rombura oku vi ri tjinga avi ri mombyarero yomeva wombura nomariro nga tutumukwa tjinga akwa rokwa. 

Posi ya ma rakiza kutja moruveze rombura ombwa ndji mai munika mOiseba na Pukiro, otuharwi ookasavero kourunga wovinamuinyo. Okurwisa ourunga Ocaso oruveze romayuva wOmuna womundu ya twa po ovimbumba mbi mavi tengerere otuveze pu pe vakerwa ovinamuinyo.

“Atu suva ngatu tengerere omarindi nozondama eyapayuva. Ngatu kare netweho nokunyinganyinga,” Murangi ma tja.  

Na ningire ovaṱuta nouṋepo wotjiwaṋa otjiṱuta okuyeta orupa indwi orwawo nokutjivisa Ocaso kangamwa ovandu poo omatemba nge hi nokuvehaamisa ominyo mozondendera zawo. “Ovinamuinyo ombi ri ombwiro yehupo retu porwe. Mu vyarwe ovingi vi tu sutira omahongero wovanatje vetu nu otji vya sere okutjeverwa. Katu sere okuyandjera omarunga okutuyeka,” ma weza ko nao.

Murangi ma pambarere kutja Ocaso mai ru nokukawondja komurungu okuungura nOporise ya Namibia okutjurura ongatukiro yoveta motjiwaṋa. “Okunene okuhepa kutja Onampora i ungura ku na eṱe okutjizikiza otjiwaṋa. Matu kondjo kutja ourunga wovinamuinyo au ha yandjerwa,” Murangi ma tja.  Na weza kutja ape ouṋepo wOcaso o-20 wa hupikwa i yOnampora ombura ndja zuko mu Suramazeva okuupangiṋa noutwe wokutjevera. 

Momautiro wa Tjitarazu ongondjero yOcaso notjiwaṋa ya tuara  kozongombe ine zourunga meṋe ya Tjimati na Zombuouvapa ze munikwe. Ovahakerwa hambondatu okuza nokuramberwa va isa etemba rawo ave tupuka. Kombunda vevari ave ka kamburwa pOzombouvapa pohambo yomeṋe yatjo i yOnampora. Nai ongonḓononeno yOporise i kayenda komurungu. Nampa