ONGWEDIVA – Kakukutu komatanga opolifi Inspector General Joseph Shikongo okwa ti ita ku ka patuluka eendingosho, neenhele adishe hadi landifa oikolwifwa otadi ka kala da pata mefiku lomahoololo. 

Ta ti eshi otashi ningwa nelalakano okuyanda ovanhu vaha ye koukefa vomahoololo va kolwa.Okwa weda po ta ti eendingosho nadi patwe mefiku olo lo27 Novemba eshi ovanhu tava ka kufa ombinga momahoololo opaupresidente noshoyo oilyo yomutumba wopashiwana. 

Okwa teelelwa eengudu dopapolitika 15 tadi ka kufa ombinga momahoololo. 

Shikongo okwa ti ou ta ka landifa omalodu mefiku lomahoololo ota ka pewa ehandukilo lopaveta. 

Okwa weda po kutya eindiko lomalodo otali keelele yoo ovanhu vaha ninge omaweelelo nokuya kondje yomilandu da tulwa po kokakomisi komahoololo koElectoral Commission of Namibia (ECN). 

“Ovanambelewa vopolifi otava ka ninga omapekapeko keendingosho okutala ovo tava landifa oikolwifa. Ovanhu ava inava fimaneke omilandu da tulwa po kopolifi otava ka longwa navo koveta,” ta ti. 

Shikongo okwa ti ovapolifi ove lilongekida okutula po elandulafano neameno koukefa vomahoololo. 

“Ovapolifi nava longe nelitulemo okukwashipaleka kutya kape na omunhu ta ka piyaaneka omahoololo,” ta ti. 

Okwa kumaida ovapolifi opo va longele kumwe noshiwana molwaashi otashi kaleke po oukumwe nombili. 

“Efiku lomahoololo ola fimana moshilongo. Ovanhu inava pumbwa okulipuma mumwe novanhu veengudu dopapolitika da yooloka,” ta ti. 

Shikongo okwa ti kape na omunhu a pitikwa okuya komahoololo a djala omudjalo wongudu yopapolitika. 

Okwa yelifa ta ti ovanhu ova pitikwa okulandifa oikulya noikunwa oyo ihe shi oikolwifa shaashi omunhu ngeenge e li momukweyo woku ka hoolola okwa pumbwa okulya nokunwa. 

Omwedi wa dja ko p e f i m b o loshikonga shoSwapo sha li kOngenga m i n i s t a womidingonoko Pohamba Shifeta okwa popya ta ti oshiwana inashi nwa omalodu ngeenge tashi ka hoolola molwaashi otashi ka ninga omapuko. 

-fhamalwa@nepc.com.na