Festus Hamalwa
Ovanafikola pofikola Emono Combined School itava ka kala vali ve li momhumbwe yoshiendifo eshi va landelwa obesa kehangano loDebmarine Etivali.
Obesa ya yandjwa oi li pongushu yoshimaliwa N$800 000 notai ka kala tai longifwa kovanafikola ngeenge tava ka pashiyona ngaashi okutalela po kEtosa National Park nosho tuu eenhele da yooloka.
Moshipopiwa shaye pefimbo ta yandje obesa omunambelewawiliki wehangano loDebmarine Otto Shikongo okwa ti ehangano lavo otali lalakanene okushakeneka epangelo ondjilakati tashi pitile mokuyambidida oshikondo shehongo.
Shikongo okwa ti okwa li a dengelwa ongodi komukulunhufikola pofikola Emono ta pula ekwafo loshimaliwa opo ofikola i dule okukalanda obesa.
“Omukulunhufikola okwa pula nge opo ndi va wedele po oshimaliwa shaashi vati ofikola oya pumbwa obesa yokukala tai twala ovanafikola kEtosha noshoyo keenhele da yooloka. Onghee okudja opo onda ninga onghendabala opo tu dule okulandela ofikola obesa ipe,” Shikongo ta ti.
Shikongo ou e li onga omunafikola mukulu pofikola Emono okwa hokolola ta ti omashongo a taalelwa kouministeli wehongo otaa kandulwa po ashike ngeenge omahangano a yooloka taa yambidida noikwafifo oyo ya pumbiwa keefikola.
Okwa kumaida ovanafikola op ova kale tave li hongo nelitulemo opo va ka ninge ovanashilonga vokomongula moifano a yooloka.
“Ovanafikola ka leni kokule noikolwifa, ovanafikola ka leni ta mu dulika kovakulunhu veni noshoyo kovahongifikola veni,” ta ti.
Okwa weda po ta ti ovadali nava kale tava taataya ounona vavo peendingosho shaashi omalodu okwa nyika oshiponga kovanafikola.
Shikongo okwa ti ofikola nai kwashipaleke kutya obesa otai kala tai wa palekwa efimbo keshe nokukala ili mefiloshisho la wana.
Lopokati opo, ehangano loDebmarine ola yandja yoo vali oikwafifo koshipangelo shaEenhana nOkongo Omaandaxa i li pongushu N$580 000.
Moshipopiwa shaye omukulunhufikola pofikola Emono Combined School Angala Angala okwa pandula unene eshi ehangano loDebamarine eshi la yambidida ofikola nobesa.
Angala okwa ti obesa oyo otai ka eta enduluko la kula mofikola eshi ovanafikola tava ka kala tava i keenhele da yooloka opo va ka ninge omapekapeko moilongwa yavo.
“Ovanafikola itava kala vali ve li momhumbwe yo shi endifo shaashi paife ofikola oya pewa obesa,” Angala ta ti.
Shishiveni Hangula e li mondodo onhi-7 pofikola Emono okwa ti paife otava kala tava kufa ombinga momaudano a yooloka noshoyo okukala tava i koinyangadalwa yoilongwa yavo keefikola da yooloka shaashi paife ova pewa obesa.