Auleria Wakudumo
Ofikola Oshikunde Combined moshikandjohongo Ohakafiya moshitukulwa shaHangwena noneudo oya ulika kutya nonande kape na oipumbiwa yehongo ye lixwa po, otashi dulika omuhongwa a hange elalakano laye.
Ofikola nonande i na omashongo ngaashi: ouhapu wovahongwa mongulu imwe, oipundi noitaafula inai wana, oikwafifohongo tai shongola, ofikola natango oye va ulikila komutwe wondjaba eshi ye ya ponomola onhiheyali mekonakono londodo 11 hano oNamibia Senior Secondary School Certificate Ordinary Level (NSSCO) moshilongo ashishe.
Ofikola oyo i li meengoya daHakafiya natango oya li ya pondola okuuya ponomola onhihamano mekonakono olo tuu olo momudo wa dja ko.
Omukuluhnufikola pofikola Oshikunde Combined Rakkel Shaahamange okwa ti epito lavo inali va halula shaashi ova li ve lilongekidila ekonaakono nawa.
“Otwa kala twe shi teelela shaashi ovahongwa vetu ova kala ve litula mo nova longa noudiinini,” ta holola ngaho.
Shaahamange okwa ti ova kala ve na oshisho alushe shokumana ko omufindahongo wavo nokukwashilipaleka kutya ova endulula omufindalandu oikando ihapu. Imwe yomomalunduluko a eta oidjemo iwa pofikola, okulundulula omulandulwahongo wavo pofikola. Ovahongi ohava landula oihongwa omuwoi wefiku.
Ovahongwa ohava dimbuka yoo po14h30, osho hashi va pe efimbo lokulihonga la wana nawa.
“Pofikola yetu ope na efiyafano lopambili nolohole pokati kovahongwa osho yo ovahongi,” ta holola ngaho.
Omukulunhufikola okwa holola yo kutya ohava mono ekwafo lakula okudja movadali nonande haaveshe. Ovadali ohava kwafa okuliyamba okuteleka pefimbo leetundi domefudo.
Nande ongaho, ofikola natango oya taalela omashongo mahapu. Okwa ti omuhongi oha dulu okuhonga ovahongwa va fike po60 mongulu imwe. “Ovahongwa vamwe ohava longelwa ofika shaashi kape na oipundi noitaafula ya wana,” ta holola ngaho. Natango ovahongwa ohava longelwa meengulu doipeleki. Shaahamange okwa ti nonande va taalelwa komashongo atya ngaha, otashi va tulifa omutwe kepepe. Okwa ti shamha ashike ovahongwa ve na omukumo nelitulemo, nena ehongo otali twikile komesho.
“Ohatu kwashilipaleke alushe kutya otwa ifana ovo ve na ounongo mokutwa ovahongwa omukumo keshe koshikako. Kakele kaashi, ohatu tu yo ovahongwa vetu omukumo fyee vene peandaxa ile mongulu omanga omuhongi ina hovela okulonga,” Shaahamange ta holola ngaho.
-awakudumo@nepc.com.na