Ovanafikola kofikola Helao Nafidi Combined moshikandjohoololo shaKongo itava ka enda vali eendjila diledile okuya keetundi molwaashi paife ova tungilwa omuhandjofikola woipeleki.

Ovanafikola ova yambididwa kehangano leeshi Kaispecho Fishing Investment noshimaliwa N$22 000  okutunga omuhandjo.

Ofikola ei oya pewa yoo vali oipakete yeeshi yoshivelelwa nosho yo eendoloma dokutula omeva.Ofikola Helao Nafidi Combined School oi na ovanafikola 500 okudja mondodo yopedu fiyo onhi-10. Omakwafo okwe uya konima eshi kansela woshikandjohoololo shaKongo Efraima Shipindo a ninga eenghendabala dokukonga omakwafo ovanafikola. 

Kansela ou okwa tota po yoo vali oporogalama yokuyambidida ovanafikola va pumbwa oikwafifohongo noshoyo okuyambidida oukadona noututa vokulikwafela ngeenge ve li komafimbo opaushitwe.

Ovanangeshefa vashona mOkongo okwa li va pewa omaano oipakete yeeshi opo va dule okulandifa okupitila mombelewa yaShipindo.

Omukulunhufikola pofikola Helao Nafidi Combined Hamukwaya Eliasa okwa ti omuhandjofikola otau tu ovanafikola omukumo wokulihonga molwaashi paife ove li popepi nofikola. “Ovanafikola vamwe okwa li hava faula eetundi shaashi ohava ende oshinano shile,” ta ti. 

Okwa weda po ta ti ovanafikola vamwe ohava kofa meetundi. Eliasa okwa pula ovanangeshefa novaleli vopapolitika opo va yambidide ofikola yaye unene tuu noikwafifohongo. 

Okwa weda po ta ti ovanafikola ova pumbwa oikulya ngeenge ve li momuhandjo wavo. 

Okwa pandula epangelo eshi tali twikile noporogalama yokatete keefikola molwaashi ovanafikola ohava kala va pama pedimo.

-fhamalwa@nepc.com.na