OMUTSEGWONIME – Omulumentu e na uulema gwomeho ngoka ta tekula oyana yaali yomimvo ntano oye awike, okwa ti onkalamwenyo oye mu dhikupalela, oshoka ke na omukwathi.
Shikudule Jekonia (41) omukalimo momukunda Omutsegwonime, ngoka gu li ookilometa 20 okuza mOmuthiya okuuka koTsumeb oha kala owala naanona ye yaali megumbo. Iitio yegumbo lyawo oya halakana, lyo ishewe olya udha komwiidhi ngoka gwa ya sigo okohi yombete yawo ndyoka natango ya longwa miiti. Okuza keelo lyegumbo sigo opomasiga opu na owala ondjila – ano oye li owala mofuka yomwiidhi.
Iinguma yawo oya nyuta komvula, oshoka omeya omeya ohaga kungulukile mondunda.
Ondjila okuya megumbo oya tulwa po kati komwiindhi, nuuna ya toola sha sho kulya – oshoka haaluhe iikulya yili po – ohaya telekele pongalangala – megumbo kamu na ondunda yoku tema.
Ndyoka olyo taya ithana egumbo lyaJekonia noyanamati, Simon naPetrus. Ashike Jekonia oku na aanona ayehe kumwe yahetatu, yahamano oye li komagumbo gooyina.
Jekonia okwa kanitha omeho ge omimvo dha piti sho anuwa kwali a yahwa nokukuthwa eho noshiti ku gumwe gomwaakwanezimo lye. Eho endjoka lya mono oshiponga olye etele ekwao, nokwa tsika thilu thilu.
“Nonando ohandi mono oshikwiila shepangelo, omolwa uulema wandje womeho oshimaliwa itashi gwana okukuta omuniilonga a yambindhindhe ndje,” ta hokolola ngaaka.
Ta ti, onkalamwenyo oye mu ndhigupalela, no kwa kala no kwiipula kutya okwa ningi shike oshinene opo a kale monkalo moka e li.
Jekonia ta ti, okwali a kwatwa kombepo yokwiikutha omwenyo, ashike oha ipula oyana, ye ishewe omugalikani, shoka sha eta opo a sinde omadhilandhilo ngoka gapiyagana.
“Iilonga oyindji ongaye handi yi longo ngame mwene, te yambindhindhwa kaanona yandje mpoka taya vulu. Okuteleka, oku opaleka okukateka omeya nosho tuu,” ta popi ngaaka.
Ta ti, okutumba endini lyomeya lyoolita 25, ookilometa dha thika pu mbali, kashi shi oshipu omanga a kwatelwa komeho koyana mboka yaali.
Ta hokolola kutya okwali ha kala naakulukandhi omanga inaa kanitha omeho, ihe oya ya.
“Thimbo limwe ohatu ka lala nondjala, unene una kaandi uvite nawa oshoka aanona yandje kaye shi okuteleka natango, ”ta ti ngaaka.
Jekonia ta popi ta ti, ngeno okwali ena omukulukandhi ngeno ote mu yakula unene kiilonga mbyoka yina okulongwa kaakulukandhi.
“Olye ta hala okukalela omulmentu keena iyemo, ye omuposi? Kape na otaya thigindje po,” ta popi ngaaka.
Ta ti, ehalo lyokushuna kaakuluntu ye kEpembe koshitopolwa shaHangwena okulina, ihe onkalo itayi shi pitike.
Jekonia okwa hokolola kutya yina nahe aakulupe, itaya vulu okumusila oshimpwiyu. Yo natango oya kalelwa kaamwayina ihaya longo oshowo aatekulu mboka ayehe ya tala ashike moopenzela dhaakulupe.
“Nonando okwali twa shangitha okumona oshikukuta, ihatu shi pewa. Aanona yandje nayo ihaya mono oshimaliwa shaanona ya taalela oluhepo,” ta ti ngaaka.
Jekonia ota indile moshigwana kehe ngoka ta vulu okumuyambindhindha eshi ningi no mwenyo gwa yela oshoka ota mono iihuna.
Ta ti, unene okuli mompumbwe yomatalashe, ondunda yoshipeleki, iikutu yaanona nonande iikulu oshowo iikulya.
Onkambandhala okundhengela kansela goshikandjohogololo shOmuthiya opo a tye ko sha oya huulile muunyengwi sho ongodhi ye yali ya dhima. –vkaapanda@nepc.com.na