ONGWEDIVA – Omukulunhuwiliki mupe wehongo moshitukulwa shaShana opo a ulikwa Pauline Shapumba okwa ti ota ka kwashipaleka kutya ovanafikola otava piti noidjemo iwa.
“Ohandi ka kwashipaleka kutya ovahongifikola otava wanifa po oilonga yavo yokulonga ovanafikola opo va kale ve na eudeko moilongwa yavo,” ta ti.
Shapumba okwa tameka oilonga Omaandaxa keembelewa dakula dehongo mOshakati.
Okwa li ta longele tete keembelewa dehongo koshitukulwa shaMusati ongomupeduwiliki wehongo.
Shapumba okwa pingena po Hileni Amukana oo a ya moshipundi shopendjela omudo wa dja ko.
Okwa weda po ta ti ota kwashipaleke kutya ombelewa otai yandje omayakulo mawa koshiwana noshoyo okulongela kumwe noikondo ya yooloka.
“Ohandi ka wanifa po oshinakuwanifa shange ngaashi naanaa nde shi linekelelwa koshikondo shehongo,” ta ti.