Taimi Haihambo
ONGWEDIVA – Osipana yokutondoka yedina Ohangwena Athletics Club moshitukulwa shaHangwena otai pula eyambidido loshimaliwa moshiwana opo i dule okutwala ounona va ka kufe ombinga momadeulo oo taa ka kala koSwakopmund.
Osipana ei oi na ehalo lokutwala ounona va hoololwa moshitukulwa ashishe, opo va dule okuya ve ke lideule koSwakopumund muJuni 2023. Onghee otava pula ekwafo moshiwana, komahangano opaumwene, oshoyo keshe tuu ou ta dulu okukufa ombinga mokuyambidida ounona ava. Ohangwena Athletics Club oya pumbwa eyambidido tali dilile moshiwana okuyandja nande oikutu yokulideula opo va dule okukufa ombinga. Natango ova pumbwa oshimaliwa opo va dule okufutila onhele opo tava ka nangala.
Teofelus Moses omunambelewa wetanga omukulu moHangwena, okwa tumbula kutya ovatondoki ava otava ulike lela ve na ohokwe yakula mokutondoka, nova hala lela okukala va deuka. “Omesho etu okwa lolokela okumona ounona ava tava kufa ombinga momaudano okondje yoilongo ya yooloka, oshoyo okukala va deuka opo va dule okukufa ombinga natango moudano wakula tau ka kala koDakar shaSenegal,” Moses ta popi. Moses ota dulu okumonika kongodi 0812345300.
Moses okwa weda po yoo natango kutya ovadali vounona va teelelwa okukufa ombinga momadeulo ova ongela po oshimaliwa N$5 700.00 nonande va pumbwa oshimaliwa shomwaalu wa fika poN$75 000.00 opo vadule okufuta keshe osho tava ka longifa. “Otwa teelelwa tu futile keshe okanona momadeulo oo taka ka kufa ombinga, oikulya oyo tai ka liwa kovanhu va fika po20 moule womafiku e li 14, oshoyo oikutu yokulideula,” Moses ta tumbula. Okwa weda po yoo kutya vo inava hala oimaliwa tai futwa ya uka meendjato davo, ova hala ashike yuukilila eemhumbwe davo.
Moses okwa tonga kutya aa oo omaudano avo otete okodula, nova dilaadila okuya koSwakopmund shaashi kave na okapale kokolela omo tava dulu okuningila omadeulo avo.