Omunambelewa wouhaku moshitukulwa shaHangwena okwa ti neudo omivalu dovanhu va kwatwa koshidu malaria owa shuna pedu mokuyelakanifa nomivalu domudo wa dja ko. Omundohotola Odon Nkongolo okwa ti neudo moshitukulwa shaHangwena omwa lopotwa ovanhu 829 va kwatwa komalaria omanga omudo wa dja ko va li 1 317.
Omudo wa dja ko okwa lopotwa omunhu umwe a xulifa komalaria omanga neudo okwa lopotwa ovanhu vavali va xulifa komalaria koshipangelo shaNgela. Onghee okwa ti eshi otashi ulike efano liwa kutya oshikondo shouhaku mOhangwena oshe litula mo nokulonga noudiinini okukondjifa malaria moshitukulwa.
Okwa didilikwa omikunda di li kombinga yokeengamba odo dimwe da didilikwa ku na ovanhu vahapu va monika oshidu shamalaria unene tuu ovakwashiwana vaAngola eshi have uya okukonga omayakulo opauhaku moshilongo. Nkongolo okwa ti ouministeli wouhaku owa tameka okutula moilonga oshikonga shokupombela momaumbo mEtitatu komukunda Okambebe oshikandjohoololo shaNgenga.
Okwa kumaida oshiwana opo shi longele kumwe novanailonga vopombela ngeenge tava pula va ye momaumbo avo. “Osha fimana ngeenge meenduda tamu twimikilwa omiti opo ku kelelwe etandavelo lomalaria,” ta ti. Okwa ti ovanhu ve na omadidiliko oshidu malaria nava lopotwe pefimbo opo va pewa epango lopaunamiti.
“Oipangelo otai twikile nokuyandjaneka eenete deemwe moshiwana,” ta ti. Okwa kumaida oshiwana opo shi kaleke po eenhele davo da yela efimbo keshe, novadali opo va kwashipaleka kutya ounona vavo ove li mefiloshisho lokukala va tuvikilwa meenete dokukelela eemwe.
fhamalwa@nepc.com.na