EESHOKE – Ovakwashiwana komukunda Eeshoke moshitukulwa shaHangwena otava tembudwa molwaashi omaumbo nomapya avo o oku li koshi yomeva. 

Omwedi wa dja ko okwa lopotwa efudja la fika koshitukulwa shaMusati omo eefikola di dulife 15 paife da pata. 

Meekulu Natalia Ndjelandu womomukunda Eeshoke okwa hokolola ta ti efundja ola fika Etivali konguloshi okudilila koAngola. 

“Epya lange alishe oli li koshi yomeva. Neudo onda lima oilya ihapu nokwa li ndi na elinekelo kutya ohandi ka likola mo shihapu mepya lange,” ta ti. 

Okwa hokolola ta ti meenduda dokunangala omwa talama omeva nosho yo kepata. 

“Paife katu na vali apa hatu telekele. Ohandi di nomonamati wange weedula 56 e na ounghundi,” ta ti. 

Kristine Nghilondo womomukunda Eeshoke okwa ti okwa tembukila keumbo lamumwaina kOmafo molwaashi eumbo laye oli li koshi yomeva. 

“Otwa pumbwa omakwafo oikulya shaashi ohatu dengwa kondjala,” ta ti. 

Ovanafikola hava di momukunda Eeshoke ihava i keetundi molwaashi eendjila odi hadi omeva. 

Omukulunhuwiliki wehongo moshitukulwa shaHangwena, Isak Hamatwi okwa ti elalakano lokupata eefikola pokafimbo opo ku kelelwe ovanafikola tava file momeva. 

“Ovadali nava tonatele ounona vavo efimbo keshe molwaashi omeva okwa nyika oshiponga,” ta ti. 

Omakwafo 

Ngoloneya woshitukulwa shaHangwena Sebastian Ndeitunga pamwe nelelowiliki koshitukulwa ova talela po omaumbo oo a dengwa kefudja. 

Okwa ti ombelewa yaye oye lilongekida okuyambidida ovanhu va ninga oihakanwa yomeva efundja. 

“Otwa longekida nale onhele opo ovanhu tava tembudilwa. Otu na eetenda da wanena ovanhu,” ta ti. 

Okwa weda po ta ti ovanhu otava ka pewa oikulya melongekumwe nombelewa yOmupilimaminista. 

Ndeitunga okwa lombwela ookansela koikandjohoololo ya yooloka opo va shifivile ombelewa yaye pefimbo kombinga yefundja. 

-fhamalwa@nepc.com.na