Oshitopolwa shaHangwena osha pandulwa kombelewa yOmuprima sho ya longo nuudhiginini noku shi pondola okugandja iikulya yoshikukuta omwedhi kehe kaantu ye vule 48 000. 

Iitopolwa yimwe ohayi pititha po oomwedhi oshoka kape na iiyenditho ya gwana, osho wo omatompelo galwe. 

Ombelewa yOmupilimaminista oya nyola kutya, oshitopolwa shaHangwena ohashi gandja oshikukuta miikandjohogololo ayihe 12 kehe omwedhi. 

“Oshikukuta shoka ohashi hawalekwa ashike nomaloli gaali, limwe lyo-NDF, noohauto  ntano dhoka dha hiilwa okuza moshigwana,” ya shanga ngaaka. 

Omunambelewa moombelewa oonene dhoshitopolwa Fillemon Hamutoko, okwa fatulua kutya oya longo nuundhiginini okutopola iikulya yoshikukuta netompelo lyokuyakula oshigwana. 

“Iikulya oya nuninwa mboka ya taalela onkalo ndjoka, onkene oyi na okukala ya thikithwa pethimbo kaape na omayimbo gasha,’’ ta ti ngaaka. 

Okwa popi kutya opo ye shi pondole okutopola i ikulya kaakalimo ayehe miikandjohogololo ayihe oya kutu aantu 20 pakathimbo okuyambidhidha okutopola iikuya osho wo oku yi helula mo moololi. 

Hamukoto okwa pandula wo aahingi yiihauto nomaloli, mboka ya kala nokuthika pethimbo okutopola iikulya, nonando nayo oya kala ya taalela uupyakandhi woondjila moshitopolwa shaHangwena. 

Ta ti, ongaanambelewa oye na oshigwana komutima sho osho taya gwanitha po ehalo lyaakalimo yawo mokuthika pethimbo ngaashi shu uvanekwa. 

Miitopowa yimwe okupitila miikundaneki aantu ohaya nyenyeta itaaya mono oshikukuta pethimbo omolwomatompelo ga yooloka. 

Yamwe ohaya mono oshikukuta konima yoomwedhi mbali. 

-vkaapanda@nepc.com.na