■ Victoria Kaapanda
ONGWEDIVA-Ngoloneya gwaHangwena Usko Nghamwa okwa ti, nonando ya kala nokukambadhala okukandula po omawupyakadhi galwe mOshitopolwa shaHangwena, omeya ogo uupyakadhi uunene ya taalela.
Omikunda dhi li heyali miikandjahogololo Ondobe nEpembe odhi li mompumbwe yomeya nodha tengenekwa okukala dha pewa omeya, ngoka taga longithwa noshimaliwa shOshikandjo shokomumvo.
“Onkambadhala ndjoka ya li ya ningwa po miikandjohogololo ngaashi Oshikunde, pOsikola Oluwaya opwa li pwa thewa omithima dhomeya, kwa longithwa oshimaliwa sha za moshiketha shehangano tali ithinwa Namibia Trust Funding (NTF), okukwathela aanasikola oshowo aakalimo yomomikunda dhopopepi “.Nghamwa ta ti.
Okwa gwedhapo ta ti shi ikwatelela kiimaliwa mbyoka yi li moshiketha shoNTF, okwa tengenekwa natango omithima dhomeya dhi vule puheyali dhi kale dha thewa miikandjohogololo ngaashi Okongo oshowo Oshikunde.
Nghamwa ta ti oopayipi dhomeya momikunda odhindji miikandjohogololo ngaashi Oshikango, Ondobe, Oshikunde,Epembe oshowo Okongo odha thelwa mo nale omanga omithima dhomeya dhali dha opalekwa nokupukululwa.
“Medhina lyondjala ndjoka ya etithwa komvula ndjoka inayi loka nawa nuumvo, oya dhigupaleke onghalo mOshitopolwa shaHangewena oshoka ohashi hupile unene muunamapya. Oshitopolwa osha kala sha taalela wo omawupyakadhi giimuna mbyoka hayi etwa omolwa uulithilo, okuza kiitopolwa yopuushinda”, Ngoloneya ta ti ngaaka.
Ta popi ta ti shono oshali wo sha dhigupaleke oshowo sha shonopaleke omeya niikwawo oyindji moshitopolwa shaHangwena. Ta ti Epangelo okupitila mOmbelewa yOmuprimaminista olya li lya gandja oomilliona N$3 opo iikandjohogololo ngaashi Okongo, Oshikunude, Omundaungilo oshowo Epembe dhi kale dha mona oopayipi dhomeya nomithima dhomeya dhi li 15.