Auleria Wakudumo
Ongudu yoNamibia Progressive Party (NAPPA) o ina etimwaumbwile kutya ngeenge oya shangifwa kokakomisi komahoololo, ndele tai shi pondola okufindana po omahoololo muNovemba, otai ka lundulula Namibia okudja mongudu onhinatu yoilongo yomounyuni ngee tashi ya keputuko, noku shi tula mongudu yotete mounyuni pomudo 2055.
Umwe womovatotipo vo-NAPP, Penda Negonga okwa ti ova kwatwa komadilaadilo okutota ongudu yavo mo2018 ashike inave shi ninga pambelewa fiyo omo 2019. Ta ti opo manga va li tava kongo omikalo odo tava longifa opo va kandule po omaupyakadi omoshilongo. NAPPA oya itavela noya fikama meitavelo loukapitali noudemokoli. NAPPA okuudite kutya oudemokoli itau tulwa moilonga nawa moshilongo ngaashi shi na okukala.
Okwa ti ongudu yavo otai ka kandula po oudjuu wemanguluko lopamaxupilo. Negonga okwa fatulula kutya ongudu otai ka kandula po oudjuu wemanguluko lopamaxupilo mokutula moilonga oinima ei; oya tota noya eta po omilandu odo tadi ka eta po eemhito doilonga dihapu kOvanamibia. Nappa otaka kandula po vati oupyakadi wokuhae na omaumbo moshilongo. Ongudu ya teelela epitiko kokomisi yomahoololo oya udaneka tai ka tota po eefaabulika moshilongo. Eefaabulika ongaashi, ongopolo mOmuthiya, endulukepo loipeleki moKatima Mulilo, endulukepo loiti moNkurenkuru, nadikwao da yooloka de lihanena oshilongo.
Kakele keefaabulika, Nappa ota ti otaka tunga omaumbo 220 000 keebilliona N$75. Otava ka tunga yo oshikunino shomalihafifo shi li molupe loshikunino shoinamwenyo keebilliona N$10. Meenghundafana naNew Era, okwa nyamukula kutya oimaliwa ei ta ka longifa okulonga oilonga aishe a tumbula ke i na paife, ashike ngeenge ongudu oya hoololwa nokutulwa koshipundi, otai ka longifa oshimaliwa shepangelo okutula moilonga eefaabulika naikwao ihapu.
“Otashi kumwifa eshi konima yeedula 33 demanguluko, Namibia ke na nande ofaabulika oyo hai mina nokueta po oikwamina yomoshilongo. NAPPA otai ka lundulula onghalo ei,” Negonga ta ti.
Nappa ota ti ongudu vati oi na owino kutya oshilandopangelo (Windhoek) osha dingililwa keendudu nexumokomesho otali iwa moshipala kedu oshoyo oshiwana shihapu, NAPPA okwa lombwela New Era kutya otaka tunga odoolopa pokati kaKahandja nOtjiwarongo.
Eshi Negonga a pulwa kombinga yeembudi odo tava dilaadila oku ka kufa modolongo, okwa ti ongudu yaye oya itavela mokuyandja omhito onhivali. “Okwa ti epangelo ohali longifa oimaliwa ihapu okukaleka po eedolongo. Noveta yoshilongo otai ti kutya omunadolongo ota dulu okudja mo ngeenge e lihumbata nawa taku talwa koinima ya wedwa po. Ovanadolongo itava i ashike moshiwana ndele otava ka kala manga komandiki evyulonghalo oule wefimbo. Okwa twikila ta ti ovanadolongo vamwe vati natango otava dulu okukwafela oshilongo, ova pumbwa ashike okulongwa omikalo manga,” Negonga ta wedapo.
NAPPA oyi na etiaoumbwile kutya okakomisi komahoololo otaka tambula ko ongudu yavo. Ova yandja omatomenho 21 tai holola kutya omolwashike oshiwana shi na okuhoolola.