Opolisi moshitopolwa shaShana oya pandula oshigwana kelongelokumwe mokukonga ohauto ndjoka kwa li ya yugwa nokulongithwa iilonga ya puka kaafuuthi sho ya li ya ponokele Uukalinawa Phamarcy.
Otaku hokololwa kutya ohauto ndjoka okwa li ya monika ongula yOmaandaha molukanda Oneshila mOshakati, sho opolisi ya li ya lopotelwa kaakwashigwana.
Sha ikolelela kuuyelele wa gandjwa komupopiliko gwopolisi gwoshitopolwa shaShana Thomas Aiyambo, oshiningwanima osha holoka ongula yOsoondaha poositola dhEtango mOshakati.
Aiyambo ta ti, ohauto okwa li ya kuthwa mwene kaafuthi, sho kwa li ye mu thiminike nokumulombwela a ze mo mohauto omanga ye mu ulika ondjembo momupolo.
“Aafuthi mboka okwa li ya zi koPhamarcy hoka ya li ya yugu nokuya ontuku niimaliwa N$23 000 koomuma. Omuhingi , ano mwene gwohauto yoCorolla Toyota, okwali a zi mo mohauto, opo ihe nduno aafuthi ya hingi po ohauto ye,” Aiyambo ta hokolola ngaaka.
Ta ti, ophamarcy okwa li ya ponokelwa kaalumentu yaali ongula yOsoondaha, moka gumwe anuwa a li homata ondjembo peke.
“Aafuthi mboka okwa li ya lombwele aaniilonga oshowo ookasitoma adhihe dhi lale pevi, ye shi ningi komulungu gwondjembo, yo taya pula aaniilonga ya gandje iimaliwa,” ta popi ngaaka.
Aiyambo okwati, pethimbo ndyoka aalumentu mboka ye li miilonga, okasitoma yimwe okwa li ya mono ompito yokwiiyaka mo mositola moka, noku ka tala ondjembo yawo kohauto.
“Pethimbo okasiitoma ndjoka ya ka galuka, aafuthi mboka oya za mo nale mositola, taya tondoka. Okasitoma okwa li ya umbu iikuti iyali mombanda, nelalakano aafuthi ya kankame,” ta hokolola. Ta ti shoka kakwa li she ya mbandamitha, ihe nayo oya li ya tameke okuumba okasitoma, shoka sha li she mu shololitha.
Aiyambo ta ti, aafuthi mboka oyo ya ka yuga ohauto ndjoka ya adhika molukanda mOneshila. “Mohauto omwa li mwa adhika okahako nokaketha kiimaliwa kaamu na nande osha,” Aiyambo ta ti ngaaka.
Opolisi natango oyi li molukongo lwaafuthi mboka, tayi indile oshigwana shi tsikile okulopotela opolisi mpoka pe na omayinyengo taga limbilike opo yi vule okukwata aafathi mboka. “Aafuthi mboka taya longo iilonga mbyoka oya pumbwa okumangwa, opo ya ze mo mo kati kaantu. Aafuthi mboka oyo wala taya longo iilonga iiwiinayi, mbyoka ya ningi esiku tayi lopotwa, onkene oya pumbwa okumangwa po,” ta popi ngaaka.