Ehangano lyomayalulo gaantu nomagumbo Namibia Statistics Agency (NSA), olya pititha uuyelele kutya Namibia okwa longitha oshimaliwa shi vulithe pomiliona N$1 pokati ko2022 no2023 momwendhi gwaFebuluali ashike. Okwa ndhindhilikwa oongala noochokolate tadhi landwa unene momwendhi gwaFebuluali omolwesiku lyohole ndyoka hali dhimbulukiwa omumvo kehe momasiku 14 gaFebuluali.
“Oochokolate momumvo 2023 momwedhi gwaFebuluali okwa li dha etwa moshilongo kongushu N$12 000, omanga mo2022 dha li poN$8 000,” NSA ta fatulula ngaaka.
NSA okwa gwedha po kutya oongala momumvo 2022 okwa li dha pula ongushu yoshimaliwa N$406 933 omanga mo2023 dha li dha pula N$670 317.Oya tseyitha kutya oya ndhindhilike kutya omwedhi gwaFebuluali ogwa longithwa oshimaliwa oshindji shi vule oshimaliwa sha longithwa moomwedhi dhilwe.
“Shika otashi ulike kutya oongala noochokalate ohadhi landwa unene momwedhi gwaFebuluali omolwesiku ndyoka lya ikalekelwa nohali dhimbulukiwa omumvo kehe,’’ ya yelitha ngaaka.
NSA okwa gwedha ko kutya omukalo gumwe ya ndhindhilike Aanamibia ohaya ulukilathana ohole momukalo gokutaambathana oongala noochokolate unene. Kundana sho kwa li a yi moonkundathana nayamwe, opo ya popye nkene esiku lyohole tali ende, yamwe omutenya gohela oya li yi ipyakandhila okufala omagano gawo kaaholike oshowo kaapambele yawo.
Suoma Simon okwa ti, esiku olya enda nawa oshoka okwa mono omagano okuza kaanegumbo ye omanga inaa ya kiilonga.
“Oshoka kakwa li nda ilongekidha, sho tandi zimbuka otandi ka kongela aanegumbo yandje uukwashikependjewo opo tu ka nyanyukilwe pamwe,’’ ta popi ngaaka.
Titus Mvula okwa ti omasiku agehe genyanyu omasiku gohole kuye. “Shampa ashike nda nyanyukwa nena ondu udha ombili nohole,” ta popi ngaaka.
Ta ti, oyendji ohaya ka longitha oshimaliwa omolwa anuwa taya ulike ohole, ihe shoka hasho ohole. ≤Komalungula ohela okwa kala taku taambathanwa omathano nomatumwalaka nkene ookuume, aakwanezimo oshowo aaniilonga naaholike yawo taya ulikilathana ohole.
– vkaapanda@nepc.com.na