OSHAKATI – Ngoloneya gwoshitopolwa shaShana Elia Irimari okwa ti ohungi okudhimbulukwa ezepo lyomupresidente omutitatu gwoshilongo Hage Geingob otayi ikundwa. Irimari ta ti, nonando ya gongala ya gandje omahekeleko koshigwana oya tegelela omalandulathano okulongekidha ohungi ndjoka tayi ka ningwa momasiku taga ka tseyithwa opo ku ka ndhimbulukiwe eso nezepo lyomupresidente.
“Otatu lili ependafule, omuleli omwaanawa, namwenyo omwaanawa oshowo omugandji ngoka ka li okatongo nandonando,” ta popi ngaaka.
Ta ti itaya mana okulila Omupresidente Geingob, onkene aakalimo yaShana otaya lili pamwe nAanamibia aakwawo, no taya tumu wo omahekeleko moshigwana.
Irimari okwa ti, onkundana ndjoka oya luudhike omwenyo gwe, oshoka ekwatathano lyawo nomupresidente olya li lya kwata miiti.
“Ondi shi oku mu tangumuna, ihe ngele onda tameke itandi mana nena,” ta popi ngaaka. Ta ti, okwa thigilwa oluhepo pamaludhi ogendji. Ta ti Geingob okwa li omuhongi, nongele owa kala ethimbo naye, opo to ka tseya kutya kosikola ino likola ko sha gwana, oshoka esiku ndyoka ote ku tseyithile ayihe wa hala okuuva. Ta popi ta ti omupresidente okwa li omuholi gwaantu, ngoka hathiki piinyangadhalwa ayihe, ngaashi yomaudhamo nosho tuu.
“Ondi na ontseyo oyindji ndjoka nda mono okuza komuleli gwandje, nonduuvite uuyamba nondi li omunelago oshoka onda yambapala kwaashoka nda tseya okuza kuye,” ta pandula ngaaka.
Irimari okwa ti, shika osho oshikando shotango Namibia ta kanitha omupresidente, onkene onkundana ndjika oya kakameke oyendji. Mayola gwelelo lyondoolopa yaShakati Leonard Hango okwa gandja omahekeleko komunyekadhi gwoshilongo Monika Geingos oshowo kaakwanezimo yomupresidente.
Ta ti, eso lyomupresidente olya thigi oyendji ye na omitima dha lindimana. “Natu tseni oongolo, e tatu gandja omuleli gwetu omwaanawa miikaha yOmuwa, eta vululukwa nombili,” ta gandja omahekeleko ngaaka.
Gumwe gomookansela melelo lyondoolopa lyOshakati Hofni Mutota okwa ti, okuuvithwa nayi keso lyomupresidente Geingob. “Onda li nda tseya omukuluntu gwetu sigo opondondo ngaa ndjoka nde mu shuwa, ihe okwa li omuleli omwaanawa,” Mutota ta ti ngaaka.
Ta popi kutya Geingob okwa li omupresidente to vulu okuthika puye, ke na uupyakadhi washa.
Ta ti namwenyo mwaanawa okwa thigi oshilongo shaNamibia noshilalo tashi ka nyengana okupola.
“Omashendjo gwomupresidente gwetu itandi ga dhimbwa nande,” ta popi ngaaka.
-vkaapanda@nepc.com.na