Auleria Wakudumo
Minista wehongo Anna Nghipondoka okwa shiivifa elunduluko moshidjemo shekonaakono eshi eepelesenda 89 dovahongwa va nyola ondodo 11 (Namibia Senior Secondary Certificate Ordinary Level) de shi endifa nawa shi dule eepelesenda 88 do2023, omanga oAdvanced Subsidiary (AS) nayo ya lundulula okudja keepelesenda 25.20 mo2023 keepelesenda 29.50 neudo.
Pefimbotashiivifaoidjemoyomudo 2024 onghela moshilandopangelo, Nghipondoka okwa holola ta ti oumisteli ou udite etumba kelunduluko loidjemo yomudo wa ya.
Ovahongwa dingi mekonakono londodo 11 aveshe ova dja koRukonga Vision School moshitukulwa shaKavango East.
Omanga eefikola nhatu depangelo odo deshi endifa nawa mekonakono olo tuu eli odo Rukonga Vision School, Onawa Senior Secondary School noRuacana Vocational Senior Secondary. Eefikola nhatu dopaumwene odo de shi endifa nawa oCanisianum, Oshigambo noSt Joseph Roman Catholic.
Minista okwa shiivifa yo oitukulwa itatu dingi oyo i na ovahongwa ve shi endifa nawa oshilongo ashishe. Oitukulwa ei ohai hololwa koidjemo yeefikola adishe moshitukulwa. Oitukulwa ye shi endifa nawa mekonakono londodo 11 ongaashi, Oshikoto, Kavango West nOmusati.
Oidjemo yoAdvanced Subsidiary Level (AS) nayo oya ulika ya lunduluka eshi ya ya pombada neepelesenda 2.9 okudja keepelesenda 85.2 mo2023 neepelesenda 88.1 2024.
Ovahongwa dingi mekonakono eli ova dja keefikola da yooloka omo vavali votete va dja kOnawa Senior Secondary School moshitukulwa shaMusati nomutitatu a dja koGabriel Taapopi moshitukulwa shaShana.
Eefikola nhatu depangelo dingi de shi endifa nawa mekonakono eli ongaashi Rukonga Vision School, Onawa Secondary School nOkatana Senior Secondary School.
Omanga eefikola dopaumwene dingi nhatu odo Canisianum Roman Catholic School, Oshigambo High School, noSt. Boniface College.
Oitukulwa ye shi endifa nawa ongaashi Kavango West, Omusati, noKavango East.
Oidjemo yovahongwa 20 dingi moshilongo oya ulika omwaalu woukadona u li pombada u dule ovamati. Movahongwa 20, oukadona ove li 14 omanga ovamati ve li ashike vahamano.
Nande ongaho, oidjemo yo- AS oya ulika omwaalu wovamati u li pombada u dule oukadona. Movahongwa 20 dingi, ovahongwa 12 ovamati omanga vahetatu oukadona.
Minista okwa holola olupandu eshi ovahongi, ovahongwa novadali vounona va kala okulitula mo nokukwashilipaleka kutya kape na okaana ka xupa ko mehongo.
“Elunduluko loidjemo otali holola elitulemo leni moilonga naasho oshi shi okupandulwa. Otashi holola kutya oshilongo osha uka komesho mehongo naava ve li meengulu dofikola ove udite ko ehongo lipe,” Nghipondoka ta ti.
-wakudumoauleria@gmail.com