Auleria Wakudumo
Elelo loshitukulwa shaShikoto pamwe nouministeli womayambule po eedoolopa nomikunda oshoyo oikondo yepangelo ya yooloka ngaashi ouministeli woikwameni, ouhaku, ounamapya, omatalele po nopolifi oya tula oukuni kumwe okutwala ehongo koikandjohoololo 11 mOshikoto.
Omuhanga woikondo yepangelo owa li wa nhuninwa okundungika ovakwashina kombinga yomayakulo elelo loshitukulwa shaShikoto oshoyo okuyandja ouyelele kombinga yeeministeli dikwao da tumbulwa metekelo.
Etalele po loikondo yepngelo ola ningwa oule woivike ivali moitukulwa aishe yoshitukulwa.
Omupopiliko welelo loshitukulwa shaShikoto, Petrus Nehale okwa holola kutya elelo loshitukulwa ola ninga etokolo eli opo li twale omakwafo popepi noshiwana ngaashi omakwafo ehongo, omadu noikumungu youmwene wedu.
“Otwali yo twa ka ndungika oshiwana kombinga youfikepamwe nonghalo nawa yokaana oshoyo omakwatafano opashinanena eli mokati ketu,” Nehale ta holola ngaho.
Nehale okwa ti oikondo imwe ngaashi oikwameni, ouhaku, ounamapya naikwao, nayo oya li ya ka ndungika oshiwana kombinga yomayakulo avo moshitukulwa nonghene ovanhu vena okushi enda opo va mone omakwafo avo.
Omunambelewa a kula melelo loshitukulwa, Christella Mwenyo okwa holola olupandu kelelo loshitukulwa pamwe nouministeli womayambule po eedoolopa nomikunda eshi va katuka onghatu ei okuyandja ouyelele womondjila kovakwashiwana.
“Endungiko eli oleya pefimbo la wapala okuyandja ouyelele womondjila koshiwana. Ovakwashiwana ovena eitavelo la puka kutya ombelewa yelelo loshitukulwa oyo ashik eina oshinakufanifwa shokukandula po omaupyakadi aeshe ovakwashiwana moshitukulwa,” Mwenyo ta ti.
Mwenyo okwa dimina kutya elelo loshitukulwa olina oshinakuwanifwa shokukwatakanifa omayakulo moshiwana ashike osha fimana okuudako kutya ohava udu omakemo oshiwana nokuninga omakwatafano neembelewa depangelo odo da wapala.
Mopaife, Mwenyo okwa ti ovakwashiwana ovena eitavelo kutya elelo loshitukulwa olo lina oshinakuwanifwa shokukandula po omaupyadi avo.
“Onghene ohatu pandula oikondo yepangelo aishe ya holola okukwashilipaleka kutya oya fika koshiwana nokuyandja ouyelele oo hau kala wa pumbiwa kovakwashiwana neenghono,” Mwenyo ta holola vali.
Mwenyo okwa kwashilipaleka kutya elelo loshitukulwa melongelokumwe neeministeli depangelo, otava ka kala hava ningi oshikonga shokuandjaneka omauyelele moshiwana odula keshe.