Auleria Wakudumo
Ominista youkashikekookanhu nonghalonawa yokaana oya ti oumunisteli wayo otau longele kumwe nopolifi okuninga omakonakono moshikumungu shomulumenhu oo okavidio kaye taka tambulafanwa komalungula ta nwefwa okaana ohubbly bubbly.
Ohubbly, ekola la dja ominino odo hadi fipwa nokudja omwifi wa yuka monkanya ngaashi naanaa omakaya. Ovanhu ohava tula mo oinima, ile oingangamwifi ya yooloka mekola omo, noha i kola ovanhu sha yooloka, she likolelela kutya oshike sha tulwa mekola.
Ovanongononi ova mona kutya ohubbly oya nyika oshiponga i dulife nopomakaya, noya talika ko ongashimwe shomoyeetifi yomafyo ombaadilila movanyasha.
Minista woukashikekookanhu Emma Kantema okwa ti ouministeli owa kumwa koshiningwanima osho notau ka katuka onghatu yopombada okukwashilipaleka kutya owa amena ounona ngaashi wa kala noku shi ninga.
“Oshiningwanima eshi otashi nignilwa omakonakono kopolifi. Onda hala okukwashilipaleka kutya ouministeli otau ka konakona oshinima eshi meendelelo nosha talwa ko sha fimana neenghono,” Minista ta ti.
Minista okwa kwashilipaleka kutya eameno nonghalonawa younona oya talwa ko ya fimana, onghene keshe osho tashi ka ya eameno nonghalonawa yavo moshipala otashi ka katukilwa onghatu yopombada.
“Fye ongovaameni vounona, itatu ke lididimikila ehepeko lounona momaumbo, oku va hepeka ile oku va longifa oilonga yoku va hepeka,” Kantema ta holola.
Kantema okwa ti otava longele kumwe nopolifi opo va longife oushili moshiningwanima eshi nokukwashilipaleka kutya oufemba yokaana owa amenwa noNamibia.
Minista okwa holola yo kutya itava dulu okuyandja ouyelele wofaafaa moshiningwanima eshi shaashi otava amene okaana oko natango ke li koshi yeedula.
Nande ongaho okwa ti ouministeli otau twikile nokuamena oufemba wounona aveshe moshilongo.
Minista okwa kamaida ovakwashiwana va kale oupafi nokulopota keshe oshiningwanima tashi limbilike, tashi ningilwa ounona momidingonoko davo.
“Natu lituleni oukuni kumwe okukwashilipaleka kutya otwa amena oufemba wounona momidingonoko detu,” Kantema ta ti.
Mokavidio taka andjanekwa komalungula, oo e li ta tengenekwa oye xe yokaana ota monika ta lombwele okaana ka fipe kohubbly omanga va kala omutumba kombete.