Festus Hamalwa
Omunyasha weedula 27 okwa hokolola ta ti okwa efa po oilonga yaye opo a dule okutonatela inakulu oo a nyika ounghundi molwaashi kape na ou te mu tonatele.
Elise Nekomba omukalimo womUupopo mOndangwa okwa ti okwa li ha longo onga omukeleli womaliko manga ina tembula ko inakulu komukunda opo a dule okukala naye mokabashu kohiila molukanda.
Okwa hokolola ta ti inakulu Maria Mwaundjange weedula 91 oku na oudu womutima, ohonde ya londa, iha dulu vali nokuenda ye okwa twika omesho.
“Omudo wa dja ko muDesemba onda ka tala ko meekulu komukunda, tu ye tu kale naye, ashike onda mona kutya kashi lidule nande ondi mu ete pwaame shaashi kape na ou te mu file oshisho eshi ndi li koilonga. Okudja opo onda tokola ashike ndi fiye po oilonga yange,” ta hokolola.Nekomba okwa weda po ta ti luhapu okwa li ha i a lata koilonga ye oha faula molwalashi omafiku amwe oha kala meumbo nainakulu.
Onghee omuhona waye okwa kala alushe ta tanguna ngeenge a lata koilonga ile a faula.
Nekomba ta ti oku na okaana keemwedi heyali, ye ke na oiyemo, osho sha djuupaleka onghlalo yaye.
“Nonande meekulu oha kwata okamaliwa kaye kopendjela, ina ka wana shaashi omo handi lande oikulya, omilambo daye, omiti noshimaliwa sholefa shoku mu twala koshipangelo,” ta hokolola.Onghee Nekomba okwa ti okwa taalela eshongo linene loikulya meumbo noshimaliwa sholefa osho ha longifa keshe koshivike ngeenge inakulu ta i koshipangelo.
“Ominambo oda ninga ondilo, omafimbo amwe ohatu dulu okukala tuhe na omilambo meumbo molwashi iha pa kala pena oshimaliwa,” ta ti.
Nekomba O} kwa weda po ta ti iha dulu vali okufuta ohiila yaye nomeva omwedi keshe shaashi iha longo vali, yee ke na oyuuyemo.
“Ohandi indile moshiwana opo shi yambidide meekulu noshimaliwa shokulanda ominambo, oikulya nosho tuu oikwafifo imwepo ya pumbiwa meumbo,” ta ti.Nekomba ota monika kongodi 0814450405.Okwa hokolola ta ti inakulu oku na ounona vahamanho ashike ka pe na ou e na oilonga ile oyuuyemo.“Ondi hole meekulu molwaashi pefimbo kwa li tuvashona oye kwa li he tu file oshisho noku tu pa oshimaliwa ngeenge ta di kopendjela. Onghee meekulu okwe tu tekula nawa noku tu longa oilonga,” Nekomba ta hokolola. Okwa weda po ta ti omafimbo amwe inakulu oha kala ta kwena nokukuwa mokule ngeenge oshidu sha pimbila. Onghee okwa ti mwene weehiila okwe mu lombwela kutya inakulu ota weelele ovanhu ve li meehiila. “Paife ondi na oumbuda kutya ohandi ka dja peni nameekulu ngeenge otwa tewa mo meehiila,” ta hokolola.
Ramolius Shipanga omonamati waMwaundjange, okwa lombwela Kundana ta ti oku na ehalo lokuyambidida ina ashike ke na sha oyuuyemo.
“Kandi na oilonga, onde lipyakidila nokukonga oilonga yokulifa oimuna ile yokulonga momapya opo ndi dule okuyambidida meme,” Shipanga ta ti.