Ovakwashiwana va dja momikunda da dingonoka odoolopa yaEenhana otava tanguna kutya oimuna yavo otai file nai moshuunda sha muni.
Va ti ovanailonga melelo lodoolopa ngee va mono oimuna yovakwashiwana ohave i shingile koshuunda shamuni ndele tave i patele ko, tava pula opo mwene wayo e i futile ko.
Ova hokolola tava ti ngeenge omunhu ina futa oshimaliwa shehandukilo oimuna yaye itei pewa onghee ohai kala ashike ya indililwa koshuunda yo oko ihai pitifwa ko ika lifwe ile ipewe lwe oikulya.
Ota ku hokololwa kutya vati Omaandaxa koshuunda sha muni waEenhana okwa li kwa dja mbakumbaku aka fudika eendongi odo da fila ko.
Umwe womukwashiwana okwa lombwela Kundana ta ti oimuna yavo oya ninga oihakanwa yondjala shaashi muni waEenhana iha yandje oikulya koimuna.
“Oimuna yetu ohai kala ashike tai dengwa kondjala i li koshuunda oko.
Otwa loloka muni waEenhana shaashi ote twetele oluhepo molwashi oimuna yetu paife oya fya po,” ta hokolola.
Omukulupe umwe okwa pula muni waEenhana opo a xulife po okutwala oimuna yavo koshuunda shaye shaashi ka ku na oikulya.
“Fyee ohatu xupu moimuna yetu. Muni na xulife po okukala tetu futifa ngeenge a kwata ko oimuna yetu shaashi ihatu kala tuna oshimaliwa shokufuta muni,” ta ti.
Eshi a kwatafana naKundana omunambelewawiliki welelo lodoolopa yaEenhana Benjemen Gabriel okwa ti ka pena oshimuna sha lopotwa sha fila moshuunda sha muni.
“Out na oikulya ya wana yoku yandja koimuna i li koshuunda shetu,” Gabriel ta ti.
Okwa weda po ta ti muni waEenhana okwa didilika ovanhu hava lifa oimuna yavo meni lodoolopa omanga tava ka nwa omalodu peendingosho.
Onghee okwa kumaida oshiwana opo shi xulife po okulifila modoolopa shaashi muni ota ka kwata ko oimuna aishe tai ka hangika modoolopa.
fhamalwa@nepc.com.na