ENDOLA – Ovakalimo vomomukunda Oshikwiyu moshitukulwa shaHangwena ova lulilwa koshikumungu sheima vati tali dipaa oikombo, eembwa, eexuxwa noumbishi. 

Otaku hokololwa kutya ‘omatikinyau’ omaima omwenyo oo ehe shivike ashike ohaa dipaa oinamwenyo momaumbo efimbo loufiku. 

Omaandaxa, Kundana okwa talela po omikunda odo da ninga oihakanwa di li moshikandjohoololo shaNdola omo ovakwashiwana va hokolola tava ti paife ova tila okweenda oufiku. 

Klaudia Nangombe okwa hokolola ta ti okwa kanifa eembwa daye mbali nokambishi kamwe da dipawa keima lihe shivike kutya ekwashike. 

“Osha li lwopotundi 02h00 Omaandaxa nda uda eembwa dange tadi kuu. Eshi nda hondamena mekende londuda onda mona eima tali nuka tali taataa eembwa moumbishi,” ta ti. 

Okwa yelifa ta ti efiku olo ina kofa molwaashi okwa li a tila pamwe kutya eima otali ponokele monduda yaye yokunangala. 

“Eshi kwa sha onda hanga ombwa yange imwe ya lika komutwe wa nyanyauka omanga imwe oya fipwa ohonde,” ta hokolola. 

Okwa weda po ta ti eshi a ka hondamena konima yonduda okwa hanga ko mbishi a nangala a fya naye a fipwa ohonde keima tuu olo. 

“Otwa mona ashike omakasha a endaenda meumbo a fa ngeno onghoshi. Katu shi kutya eima ekwashike,” ta ti. 

Kansela woshikandjohoololo shaNdola Ferdinand Shifidi naye okwa li a fika keumbo oko nelalakano lokupwilikina kombinga yoshikumungu eshi. 

Shifidi okwa koleka ta ti natango neudo moshikandjohoololo shaye okwa li mwa lopotwa oshikumungu shoikombo ya hangika ya fya eshi ya dipawa keima tuu olo. 

“Otwa didilika oikumungu yomaima omatikinyau taa longele oimuna ominyonena moshikandjohoololo shetu okudja omudo wa djako,” kansela ta ti. 

Petrus Kahambulwa okwa hokolola ta ti efiku tuu olo eima la ponokela omaumbo avo, okwa penduka lwopotundi 04h00 eshi a uda ombwa yaye tai kuu. 

“Onda kufa omupini ndele handi i pondje. Eshi nda fika pondje onda hanga eima tuu olo tali dedaula ombwa yange i li koshi,” ta hokolola. 

Okwa ti okwa endelela ndele ta denge eima nomupini mombuda ndele tali faduka po. 

“Eima ola kuwa mokule ndele tali nuka oiti deumbo,” ta ti. 

Okwa ti okudja opo okwa kufa po ombwa yaye ndele ta ka nangla nayo monduda. 

-fhamalwa@nepc.com.na