ONGANGWA – Ovanhu vaheyali ova fya, navahamano ova lemana moiponga yolusheno ya ningwa okudja omudo wa dja ko fiyo oneudo.
Edi oda popiwa kOmunambelewawiliki ta kwafele kehangano lolusheno loNored Toivo Shovaleka Etivali pefimbo va niga omutumba nehangano la shiya ko mokuungaunga noikwamalusheno moshilongo loElectricity Control Board.
Shovaleka okwa ti oiponga aishe ya ningwa oi li 13.
Omahangano aa okwa li a shakena nelalakano lokukundafana kombinga yoshikumungu shovanhu tava fi nokulemanekwa kolusheno.
Okwa ti ova taalela eshongo linene lovakwashiwana tava kwata eengodi dolusheno ngeenge da wa po komidingonoko davo.
“Otwa tameka okuyandja ehongo nouyelele koshiwana opo shiha kwate vali eengodi dolusheno molwaashi osha nyika oshiponga,” ta ti.
Okwa weda po ta ti ombelewa yavo oya kumaida oshiwana opo shi lopotele opolifi ile ovanailonga voNored ngeenge kwa monika eengodi dolusheno de lidenga po.
“Otwa yandja eenomola deengodi koshiwana opo shi dule okutuma etumwalaka efimbo keshe ngeenge va mona eepaala ile eengodi dolusheno de lidenga po,” ta ti.
Shovaleka okwa yelifa ta ti ovanailonga voNored ovo tava twikile nokupewa omadeulo nghene ve na okupangela ngeenge olusheno la dima.
“Ohatu lalakanene okukelela omafyo noiponga yovanhu tava kwatwa kolusheno,” ta ti.
Pefimbo lomutumba, Omukulunhuwiliki woElectricity Control Board (ECB), Robert Kahimise okwa ti moule weedula nhee da pita okwa lopotwa oiponga 17 ya etwa kolusheno.
Okwa yelifa ta ti oiponga yovanhu va lemanekwa nomafyo oya lopotwa komahangano a yooloka olusheno e li moshilongo.
Kahimise okwa weda po ta ti Nored oye umwe a lopota omivalu dihapu doiponga ya etwa kolusheno.
Okwa lombwela ovakulunhuwiliki vaNored opo va kwashipaleke kutya ovanailonga ova deulikika nawa tete manga ina ka pangela olusheno.
“Ovanailonga nava kale ve na oilongifo ya wana ngeenge tava ka pangela olusheno. Ovanailonga nava kale tete va ninga omapekapeko nghene ve na okutameka oilonga yokupangela olusheno la dima unene tuu kwa li taku lokwa,” ta ti.