Auleria Wakudumo 

Opolifi oya lopota oiponga yomeendjila itano i nyanyalifa mexuliloshivike omo ovanhu omuwoi va kanifila mo eemwenyo. 

Oiponga oyo ya twaalela eemwenyo omuwoi, omwa kwatelwa osho sha fila omukulunhu woAgro Marketing and Trade Agency (AMTA) konooli Jacob Hamutenya weedula 36. 

Oonakuningwa oihakanwa vakwao ova tongololwa ovo Abner Kandjimi weedula 31 naNdateelela Shilongo weedula 41 oo a xulifila koshipangelo shepangelo shaTjiwarongo. 

Oshiponga eshi osha holoka mondjila yakula yoB1 eekilometa di li lwopo20 okuya mOtjiwarongo, okudilila kOtavi, lwopo 15h56. 

Otaku hokololwa kutya omushingi okwa nyengwa okupangela otuwa sha dja eshi a pitilila otuwa ikwao osho sha eta otuwa vati i we kopate ndele tai alangata oikando ihapu. Vamwe vomovatwaalelwa vati ova umbwa mo moshiendifo. 

Oshiningwanima shikwao, ovanhu vane ova xulifa poshikando omanga vane va twalwa koshipangelo molwoshiponga shotuwa. 

Omupopiliko wopolifi Deputy Commissioner Kauna Shikwambi okwa holola ta ti oshiponga osha ningilwa mopate yo-B4 koBethanie moshitukulwa sha//Karas lwopo 16h00 Etitano. 

Shikwambi okwa holola ta ti omushingi okwa nyengwa okuukililifa otuwa okuya mondalaye osho sha eta otuwa i we ko kopate. 

Oonakufya mwa kwatelwa omushingi, ova tongololwa ovo Edward Menatzick weedula 54, Gerhardus Menatzick weedula 25, Adriana Bostander okaana keedula mbali, na Andries Breethoring weedula 28. 

Otaku hokololwa kutya ovali mo vahetatu motuwa pefimbo loshiningwanima. 

Ovanhu vanhe ova twalwa koshipangelo shepangelo koKeetmanshop oko tava mono epango lopaunamiti. 

Oshiponga shotuwa shikwao osha ningwa Etitano lwopo 20h00, sha ningilwa pokati kaLeonardville naGobabis. 

Otaku hokololwa omushingi a nyengwa okuukililifa otuwa manga a uka mondalaye osho sha eta otuwa i we ko kopate noku va umba mo motuwa. 

Nakufya okwa tongololwa oye Terence Maritshane weedula 23. 

Omutwaalelwa okwa twalwa koshipangelo shepangelo koGobabis oko e li ta mono epango lopaunamiti. 

Oshiningwanima shikwao, okaana oka xulifa moshiponga shotuwa sha ningilwa mondjila yo-B1 koRehoboth, sha ningwa Olomakaya lwopo 17h30. 

Otaku hokololwa omushingi wotuwa a nyengwa okuukililifa otuwa osho sha eta i we ko kopate. 

Nakufya okwa tongololwa oye Ethan Katiti. 

-wakudumoauleria@gmail.com