Kakukutu kopolifi Inspector General Joseph Shikongo okwa ti osha fimana ngeenge oshiwana shi li popepi noitaashi yopolifi opo shi dule okulopota oimbuluma pefimbo.

“Oitaashi yopolifi otai kwafele okukandeka oimbuluma noupu,” ta ti.

Edi Shikongo okwe di popya onghela pefimbo kwa li ta patulula oshitaashi shopolifi komukunda Ohenghono moshikandjohoololo shaMundaungilo, kOhangwena.

Mopaife ngaha moshitukulwa shaHangwena omu na oitaashi yopolifi 12.

Oshitaashi osha tungwa kongushu yoshimaliwa eemilliona N$7.

Oshivike sha dja ko koshikandjohoololo shaMulonga okwa patululwa oshitaashi shopolifi sha tungwa kongushu yoshimaliwa sheemiliona N$6.5.

Oshitaashi shopolifi osha tungwa shi li kombinga yokeengamba daNamibia naAngola.

Shikongo okwa ti ovakwashiwana vomomukunda Ohenghono itava ka enda vali eendjila diledile molwaashi paife ova etelwa oshitaashi shi li popepi.

Okwa yelifa ta ti ombelewa yaye otai twikile okuyandjaneka omayakulo opolifi koshiwana. 

Okwa kumaida oshiwana opo shi ka konge omayakulo opolifi nokukala sha lopota oibofa pefimbo.

“Yakuleni nawa oshiwana pehe na omunhu ta ningwa okatongo,” Shikongo ta ti.

Okwa popya ta ti oshiwana nashi longele kumwe nopolifi okukandeka oimbuluma momidingonoko davo.

Shikongo okwa ti ombelewa yaye itai ka fiya emanya la londa kulikwao kombinga yovapolifi itavelihumbata nawa.

Okwa pula ovapolifi opo va ulike oshihopaenenwa shiwa moshiwana molwaashi ohava longo nokutula po elandulafano nokukaleka po eameno loshiwana.

Okwa weda po ta ti omunhu keshe ta ningile ovanhu omahepeko omomaumbo na lopotwe opo a pewe ehandukilo lopaveta molwaashi eshi otashi kwafele okushunifa pedu omahepeko oukashikekookanhu.

-fhamalwa@nepc.com.na