< Taimi Haihambo
By-Faith Lwishi okwali a shike okaana ka dalwa keli nawa fiyo ta wanifa eedula hamano. Kwali ha i kofikola, e hole oudano. Paife iha ende, iha popi, iha dulu okuli kwafa mwene, noikulya oha li ashike omashini ile ojuice tai pitile mokamunino…
Ina, Olivia Lwiishi (40) omukalimo waNgwediva okwa ti, onghalamwenyo yokaana kaye oya lunduluka ashike momutenya umwe momudo 2021, eshi vati a undulwa kumukwao kofikola.
Pokuundulwa opo, okwa dja po a ninga onhumbilila moshipala, oyo petameko kakwali ve wete ngeenge oshinima tashi ka xulila moulema. Konima yoshininwanima eshi, okamonamati aka vati oka monika omukifi woLandau Kleffner syndrome, oo waka denga fiyo okexukamwoongo nokape na vali eteelelo ngeno a ka kale monghalamwenyo omo a li nale.
“By-Faith okwa tameka ashike ha haluluka ta ti oku wete ovanhu noipopolo, ashike ame ka kwa li handi imono. Ohaluka okwa tameka he lidenge po, ye te li kanyatela oikando ihapu osho sha twaalela fiyo omounghundi omo eli nena.
“Paife eshi hatu popi ngaha By-Faith okuna okamunino medimo, oko handi xwela omashini, oshoyo oikunguluki, shaashi oyo ashike ha li,” Olivia ta ti.
Okwa ti By-Faith ihali ashike omashini oludi keshe, vati okuna omashini kondadalunde aa a shangelwa kundokotola edina ‘Pedia sure milk haa landwa ashike meepharmacy.
Kakele koikulya By-Faith oha djala ominambo ye efimbo nefimbo ota pumbwa okamunino oko haka pitile oikulya taka ifanwa ‘Gastrotonomy tube’. Olivia ta ti okamunino oko ohaka vatele yoo okaana kaye kadule oku pitifa omhepo, noku kapa omiti. Ta ti kakele kaBy-Faith natango okuna ounona vavali, ashike yee kena apa halongo.
“Kashipu oku tala nokutekula okaana kange keli monghalo yatya ngaha, omanga ngaho kwa li kadalwa kena oukolele, koo okanyakukwi nokadanauki kamana,” Olivia ta ti. Okwa ti ota indile Ovasamalia ovanamutimanghenda vemu vatele apa tava dulu opo adule oku kwafa okamona. Okwati ota kapandula neenghono ava tava kakufa onghatu mokumuvatela. Ota ti yoo ota monika ko 0812968025.