Okaana keedula heyali vati oka kwatwa onghonga kuxekulu meumbo lavo momukunda Elwafa moshikandjohoololo shaMulonga moshitukulwa shaHangwena.
Omukonakoni woimbuluma wopolifi moshitukulwa shaHangwena omupedu Commissioner Zacharia Amakali okwa hokolola ta ti okaana oka kala vati nokukwatwa onghonga oikando ya yooloka okudja momwedi Januali. Okwa hokolola ta ti omulumenhu oo vati okwa kala ha ningile okaana oko omatilifo ta ti ote ka dipaa ngeenge oke mu lopota kovaneumbo.
Omufekelwa okwa kwatwa po nota holoka momhangu yEenhana Etine, ota pangulilwa oshibofa shekwatonghonga.
Opolifi oya hokolola tai ti oya taalela eshongo loibofa yomakwatonghonga oyo hai lopotwa kwa laata neenghono.
Onghee eshi ohashi djuupalele opolifi nohashi imbi opo ku ningwe omakonakono omondjila. Minista woukashikekookanhu nonghalonawa yokaana Doreen Sioka okwa ti ovalumenhu tava i moixulo nounona vashona nava lopotwe opo va kale va pewa ehandukilo lopaveta.
“Ka pe na omulumenhu e na oufemba wokuya moixulo nokaana kanini ile a kwate ovakainhu onghonga,” ta ti.
Okwa weda po ta ti ovadali navo nava tonatele ounona vavo ngeenge ve li momaumbo shaashi ounona voukadona vopaife ova ninga oihakanwa yokulongelwa omunyonena wopaixulo kovapambele vavo.
fhamalwa@nepc.com.na